ოპოზიცია 17 ნოემბერს გრანდიოზულ აქციას აანონსებს

1251

ოპოზიციური პარტიები პარლამენტთან აქციას 17 ნოემბერს გამართავენ. “გაერთინებული ოპოზიციის” ლიდერი გრიგოლ ვაშაძე ამბობს, რომ დღეს პარლამენტში მიღებული გადაწყვეტილებით, საქართველოს მოქალაქის ღირსება გათელეს ფეხქვეშ.

„ოპოზიციის წარმომადგენლებს გვქონდა თათბირი, დავილაპარაკეთ. ერთი რამ მინდა გითხრათ, ამის მოთმენა არ შეიძლება, ვინც სახლში ხართ, გამოდით, რადგან სახელმწიფოს გარდა, არაფერი დაგრჩათ და იმასაც გართმევენ. აძლევთ ამ სახელმწიფოს ოლიგარქს? გამოდით ქუჩაში, რა გინდათ ამ დროს სახლში. იმ თათბირზე, სადაც ვიყავით, პატიოსან სიტყვას გაძლევთ, გაცილებით რადიკალური ღონისძიებების მომხრე ვიყავი, მაგრამ კომპრომისი კომპრომისია და შეთანხმება შეთანხმებაა.

მთელი ოპოზიცია მინუს ერთი, გაერთიანებულია, ყველა იდეოლოგიური განსხვავებები გვერდზეა გადადებული, ვადამდელი არჩევნები და ახალი შემადგენლობა, სამოქალქო საზოგადოების მიერ დაკომპლექტებული ცესკო-ში. მინდა, „ქართულ ოცნებას“ ვუთხრა, რა სისტემითაც არ უნდა ჩაატაროთ არჩევნები, თბილისურად გეტყვით, გაგხევთ ნაკერავზე. ყველაზე უფრო აღმაშფოთებელი არის ის, რომ გაძლევენ დაპირებებს და ეს დაპირებები მიაქვთ, შემდეგ ყველაფერს აბრალებენ ოპოზიციას.

ტელევიზორში რომ გვეუბნებით, ხუნდაძე აუმხედრდა ივანიშვილსო, ბარემ ის გეთქვათ, რომ დილას ივანიშვილის ფეხსაცმელები აუმხედრდა ივანიშვილს, არ გეცინებათ თქვენ თვითონ? ოპოზიცია ერთად არის, ამისთანა ერთობა ოპოზიციას არ ჰქონია ეროვნული მოძრაობის შემდეგ. ოპოზიციამ მიაღწია ცესკო-ს შემადგენლობის გამოცვლას და დამთავრდა კომუნიზმი საქართველოში, ამას ყველაფერს მივაღწევთ. ქართველებს სახელმწიფო გარდა არაფერი აღარ დაგვრჩა. 150 ათასი ბავშვი შიმშილობს, არ დავუთმოთ ეს სახელმწიფო, რადგან არავინ გვაპატიებს ამას. 23 ნოემბერი მოდის და გაიხსენეთ, რა მოხდა მაშინ საქართველოში. 17 ნოემბერს ყველანი დიდ მიტინგზე“, – განაცხადა ვაშაძემ.

პროპორციულ საარჩევნო სისტემაზე გადასვლასთან დაკავშირებით საკონსტიტუციო ცვლილებები პარლამენტში დღეს ჩავარდა. ცვლილებებს მხარი მხოლოდ 101-მა დეპუტატმა დაუჭირა. 3 წინააღმდეგი წავიდა. მათგან 37-მა დეპუტატმა კი თავი შეიკავა. კანონის მიღებას 113 ხმა სჭირდებოდა.

ჩავარდნილი საკონსტიტუციო ცვლილების შემდეგ პარლამენტის თავმჯდომარე არჩილ თალაკვაძემ განაცხადა, რომ 2020 წლის საპარლამენტო არჩევნები ისევ შერეული სისტემით, ბლოკებით და 3%-აინი ბარიერით ჩატარდება.

დღეს განვითარებული მოვლენების გამო პარლამენტის წინ საპროტესტო აქციები დაიწყო, რომელსაც მოძრაობის “სირცხვილია” და “შეცვალე” წარმომადგენლები მართავენ. აქციის მთავარი მოთხოვნაა ვადამდელი საპარლამენტო არჩევნები პროპორციული წესით, მანამდე კი ქვეყანას გარდამავალმა მთავრობამ უნდა უხელმძღვანელოს.

პარალელურად “ლეიბორისტული პარტიის” ოფისში შეიკრიბნენ ოპოზიციის ლიდერები. შეკრების შემდეგ გაკეთდა განცხადებები, რომ ოპოზიცია იზიარებს აქციის მთავარ მოთხოვნას – ვადამდელ არჩევნებს პროპორციული წესით. მიზნის მიღწევამდე კი საპროტესტო აქციებს აანონსებენ.