წყლის ჭავლით დაშლისას აქციის მონაწილეები დაშავდნენ. ცესკოს პერიმეტრს საპოლიციო ძალები აკონტროლებენ

1203

წინა სტატია

ცესკოსთან წყლის ჭავლით დაშლისას აქციის მონაწილეები დაშავდნენ. საპროტესტო აქციაზე მისული მოქალაქეების წყლის ჭავლით დაშლა ცოტა ხნის წინ გაუფრთხილებლად დაიწყეს, რასაც მოქალაქეების მხრიდან სამართალდამცველების მისამართით ქვების სროლა მოყვა.

ამ დროისთვის ცესკოს პერიმეტრს საპოლიციო ძალები აკონტროლებენ. იქ ჯერ კიდევ არ მისულან მანიფესტაციის მონაწილეების ნაწილი და ოპოზიციის ლიდერები.

როგორც ცნობილია, რუსთაველის გამზირზე მიმდინარე აქციის მონაწილეები ცესკოს შენობისკენ ნიკა მელიას მოწოდების შემდეგ დაიძრნენ.  მელიამ აქციის მონაწილეებს მოუწოდა, ცესკოს შენობისკენ გადაენაცვლებინათ, სადაც მოაწყობენ პიკეტირებას, რათა შენობაში შესვლა და არჩევნების შემაჯამებელი ოქმის დაწერა ვერ შეძლონ.

დღეს რუსთაველის პროსპექტზე მიმდინარე საპროტესტო აქციაზე ოპოზიციამ ხელისუფლებას ულტიმატუმი წაუყენა – ცესკოს თავმჯდომარის, თამარ ჟვანიას გადადგომა, რის შემდეგაც ოპოზიცია მზად იყო ივანიშვილთან შეხვედრაზე ახალი არჩევნების ჩატარების თაობაზე. საღამოს რვა საათზე კი ოპოზიციის ერთ-ერთმა ლიდერმა ნიკა მელიამ აქციაზე განაცხადა, რომ კონტაქტი შედგა ოპოზიციასა და ხელისუფლებას შორის, კერძოდ, არჩილ თალაკვაძესა და ირაკლი კობახიძესთან, რომლებმაც ითხოვეს, რომ ხვალისთვის მოხდეს მოლაპარაკება. მელიას საპასუხოდ ქართული ოცნების აღმასრულებელმა მდივანმა განაცხადა, რომ მელია ტყუის და მას და არჩილ თალაკვაძეს მოლაპარაკების თხოვნით ოპოზიციონერმა დეპუტატმა თინა ბოკუჩავამ დაურეკა. კობახიძის თქმით, საერთაშორისო პარტნიორებს სურთ შეხვედრის ორგანიზება მმართველ პარტიასა და ოპოზიციურ პარტიებს შორის და რადგან ხელისუფლება ანგარიშს უწევს ხოლმე საერთაშორისო პარტნიორების მოსაზრებებს, დაელოდებიან მათ ინიციატივებს.