ბოლნისის მუნიციპალიტეტში, ამ დროისთვის, საერთო ჯამში კორონავირუსი 121 მოქალაქეს დაუდგინდა. აქედან 32 გამოჯანმრთელდა, სამი კი გარდაიცვალა,- აცხადებენ ბოლნისის მერიაში.
მათივე ინფორმაციით, თვითიზოლაციაში 145 ადამიანი იმყოფება, კარანტინში კი 97.
აღსანიშნავია, რომ 50 დღეა ბოლნისის მუნიციპალიტეტის მოსახლეობას საკარანტინო მდგომარეობის პირობებში უწევს ცხოვრება.
„საბედნიეროდ, დადასტურებული შემთხვევების რიცხვი ჩვენს მუნიციპალიტეტში იკლებს, რაც დამაიმედებელია და საკარანტინო წესების ზედმიწევნის შესრულების შემთხვევაში, საშუალებას გვაძლევს ბოლნისში მთელი რიგი შეზღუდვები დროულად მოვხსნათ. ბოლნისის მერიისა და საზოგადოებრივი ჯანდაცვის ცენტრის გადაწყვეტილებით, კონტროლირებადი ეპიდემიოლოგიური სიტუაციიდან გამომდინარე, სოფელ ქვემო ბოლნისში მკაცრი საკარანტინო მდგომარეობა რამდენიმე დღეა აღარ მოქმედებს, თუმცა ბოლნისის მუნიციპალიტეტში ჩაკეტილ ზონად კვლავ რჩება ქალაქი ბოლნისი, დაბა კაზრეთი, სოფლები: რაჭისუბანი, ბალიჭი, ხატისოფელი, მუშევანი და სავანეთი. ვინაიდან კორონავირუსის დადასტურებული შემთხვევების რიცხვი საგრძნობლად შემცირდა სპეციალისტებთან კონსულტაციის შემდგომ ამ ტერიტორიებსაც მალე გავხსნით“,- განაცხადა ბოლნისის მუნიციპალიტეტის მერმა, დავით შერაზადიშვილმა.
აღსანიშნავია, რომ ბოლნისის მუნიციპალიტეტში უახლოეს დღეებში რამდენიმე მიმღები ცენტრი მოეწყობა, სადაც კორონავირუსზე რისკჯგუფებში მყოფი მოქალაქეები მასიურად შემოწმდებიან, ეს პროცესი სოფელ მუშევანიდან დაიწყება. ეპიდემიოლოგები აქტიურად მუშაობენ სოფელ გეტაშიც, სადაც ბიოლოგიურ ნიმუშებს იღებენ.
„აქტიურად ვაგრძელებთ მოწყვლადი კატეგორიის მოქალაქეების დახმარებას. ამ ეტაპისთვის მერიის მიერ შეძენილი და კერძო პირების მიერ შემოწირული 14, 837 სასურსათო პაკეტი დავარიგეთ. ეს პროცესი გაგრძელდება და მუნიციპალიტეტი ყველა ბენეფიციარს სურსათით კვლავ აუცილებლად დაეხმარება. ჩვენს მუნიციპალიტეტში უკვე განახლდა ინფრასტრუქტურული პროექტები. მუნიციპალიტეტის შესაბამისი სამსახურები ობიექტების ზედამხედველობას აქტიურად აწაროებენ, რათა ინფრასტრუქტურული სამუშაოებისას ჯანდაცვის სამინისტროს მიერ დადგენილი უსაფრთხოების ყველა წესი ზედმიწევნით შესრულდეს. მუნიციპალიტეტში ასევე აქტიურად მიმდინარეობს სასოფლო-სამეურნეო სავარგულების დამუშავება. ჩვენი ფერმერები საგაზაფხულო სამუშაოებს შეფერხების გარეშე ახორციელებენ.
ეტაპობრივად მიმდინარეობს ბოლნისის მუნიციპალიტეტიდან იმ მოქალაქეების გაყვანა, რომლებიც მუნიციპალიტეტში არარეგისტრირებულები არიან და კარანტინის გამოცხადებისას აქ მოუწიათ ყოფნა. მუნიციპალიტეტიდან მოქალაქეების გადაყვანა სპეციალურად გამოყოფილი ავტობუსითა და კარანტინით გათვალისწინებული ყველა წესის დაცვით ხორციელდება. პირები, რომლებიც ბოლნისის მუნიციპალიტეტს დატოვებენ სავალდებულო კარანტინს გაივლიან“, – აღნიშნა დავით შერაზადიშვილმა.
მისი განმარტებით, ამ დროისთვის მუნიციპალიტეტის ტერიტორია 394-მა მოქალაქემ დატოვა.
„ბოლნისის მუნიციპალიტეტში მოქმედებს 24-საათიანი ცხელი ხაზი, რომლის მეშვეობითაც ჩვენს მოქალაქეებს შესაბამის ინფორმაციას ვაწვდით და მათ ნებისმიერ პრობლემაზე სხვადასხვა სამსახური დროულად რეაგირებს. მუნიციპალიტეტში ასევე მიმდინარეობს იმ პირების ბაზის შექმნა, ვისი სოციალური მდგომარეობაც საგანგებო მდგომარეობის გამო გაუარსედა. ჩვენ აქტიურად ვაგრძელებთ საინფორმაციო კამპანიას კორონავირსუსის სიმპტომების, მისგან თავის დაცვისა და საკარანტინო წესების შესახებ. ეთნიკურად დასახლებულ სოფლებში მოსხლეობას ინფორმაცია ორ ენაზე, აზერბაიჯანულად და სომხურად, მიეწოდება.
ვიმედოვნებ, რომ ბოლნისის მუნიციპალიტეტში არსებული საკარანტინო რეჟიმი მალე მოიხსნება, თუმცა ამ მიზნის წარმატებით განხორციელებაში თითოეულმა ჩვენგანმა ჩვენი წვლილი უნდა შევიტანოთ, დავიცვათ ყველა წესი, რეკომენდაცია და გავუფრთხილდეთ ჩვენსა და ერთმანეთის ჯანმრთელობას“, – განაცხადა ბოლნისის მუნიციპალიტეტის მერმა.
ახალი კორონავირუსის გავრცელების გამო 21 მარტს საქართველოში საგანგებო მდგომარეობა, ხოლო 31 მარტიდან კარანტინი გამოცხადდა. საგანგებო მდგომარეობა ქვეყანაში 22 მაისამდეა დაწესებული.
კარანტინის ფარგლებში სრულად იკრძალება ნებისმიერი ტიპის საზოგადოებრივი ტრანსპორტით, მათ შორის, მეტროთი, გადაადგილება. 21 საათიდან დილის 6 საათამდე კი ქვეყნის მასშტაბით კომენდანტის საათი მოქმედებს, რის გამოც გადაადგილება ეზღუდება როგორც ქვეითად, ისე ტრანსპორტით მოსიარულეებს. მათთვის კი, ვისი მუშაობაც ამ პერიოდში აუცილებელია, გადაადგილება სპეციალური საშვებით მოხდება. ყველა მოქალაქეს ქუჩაში გადაადგილებისას, დღის ნებისმიერ დროს, თან უნდა ჰქონდეს პირადობის დამადასტურებელი დოკუმენტი.
სასურსათო მაღაზიებსა და აფთიაქების გარდა, საქართველოში 3 პირზე მეტის შეკრება აიკრძალა. ამასთან, დახურულ საჯარო სივრცეში პირბადეების ტარება სავალდებულო გახდა.
COVID-19-ის აფეთქება ჩინეთში 2019 წლის დეკემბერში დაიწყო და დღეისათვის ის მსოფლიოს 212 ქვეყანაშია გავრცელებული. ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. ამ დროისთვის კორონავირუსი განსაკუთრებით ევროპის კონტინენტზე მძვინვარებს. საქართველოში ამჟამად COVID-19-ით ინფიცირების 639 შემთხვევაა დაფიქსირებული, საიდანაც 349 უკვე გამოჯანმრთელდა, 11 ადამიანი კი გარდაიცვალა.
