რეგიონული განვითარებისა და ინფრასტრუქტურის მინისტრის, მაია ცქიტიშვილის განცხადებით, აზიის განვითარების ბანკი და ევროპის რეკონსტრუქციისა და განვითარების ბანკი პოსტკრიზისულ პერიოდში კერძო სექტორის დასახმარებლად საქართველოს ახალ ფინანსურ რესურსს გამოუყოფს.
ამის შესახებ ცქიტიშვილმა აღნიშნული საფინანსო ორგანიზაციების პრეზიდენტებთან ვიდეოკონფერენციით საუბრის შემდეგ განაცხადა. მისი თქმით, საუბრისას ის შესაძლო დახმარება განიხილეს, რომელსაც აზიის განვითარების ბანკი და ევროპის რეკონსტრუქციისა და განვითარების ბანკი საქართველოს პანდემიის გამო გაუწევს.
„მოგეხსენებათ ძალიან ძლიერი და სერიოზული პარტნიორები არიან საქართველოსი აზიის განვითარების ბანკი და ევროპის რეკონსტრუქციისა და განვითარების ბანკი. ორივე ამ საფინანსო ინსტიტუციის მიერ საქართველოში დაფინანსებულია ასეულობით მილიონობით დოლარის ინვესტიცია. ყველა ის დიდი ინფრასტრუქტურული პროექტი, რომელიც არის დაფინანსებული აღნიშნული ორგანიზაციების მიერ, მიუხედავად არსებული კრიზისისა დღესაც ფუნქციონირებს და აქტიურ ფაზაშია.
თუმცა ჩვენ პრემიერ-მინისტრთან და ფინანსთა მინისტრთან ერთად გვქონდა საშუალება გავსაუბრებოდით აზიის განვითარების ბანკის პრეზიდენტს და ევროპის რეკონსტრუქციისა და განვითარების ბანკის პრეზიდენტს, სადაც იქნა განხილული ის შესაძლო დახმარება და შესაძლო ახალი საფინანსო რესურსი, რომელსაც ორივე ეს ორგანიზაცია გამოუყოფს საქართველოს ამ გლობალური პანდემიის გამოწვევებიდან გამომდინარე.
ორივე შემთხვევაში ვსაურობთ იმ დახმარებაზე, რომელიც გაწეული იქნება კერძო სექტორზე, ქართულ ბანკებზე, ასევე კერძო ბიზნესისთვის. ორივე ორგანიზაცია ეხმარება მათაც ამ რთულ პერიოდში, თუმცა ამავე დროს, ჩვენი საუბრის მნიშვნელოვანი ნაწილი შეეხო პოსტკრიზისულ ზომებს, იმ დახმარებას, რომელსაც ორივე საფინანსო ინსტიტუციიდან უნდა ველოდოთ იმისთვის, რომ შემდგომში დავეხმაროთ როგორც სახელმწიფო დაფინანსების თვალსაზრისით, რასაც ისედაც ვაკეთებთ კერძო ბიზნესისთვის, ასევე კერძო დაფინანსების თვალსაზრისით“,- განაცხადა ცქიტიშვილმა.
