თელავის მუნიციპალიტეტის 2019 წლის ბიუჯეტიდან ჩამდინარე წყლების სისტემების მოწყობა რეაბილიტაციასა და ექსპლოატაციის ღონისძიებებისთვის 180 000 ლარი დაიხარჯება. ინფორმაციას კახეთის ხმა ავრცელებს.
თელავის მერიაში აცხადებენ, რომ აღნიშნული თანხა არსებული ნიაღვარმიმღებების მოვლა-პატრონობასა და ახალი ნაგებობის მოწყობას მოხმარდება.
“აღნიშნული მიმართულებით გამოყოფილი 180 000 ლარიდან, არსებული ნიაღვარმიმღებების მოვლა-პატრონობაზე 50 000 ლარი, ხოლო, სოფელ კურდღელაურის ცენტრალურ გზაზე, ქალაქ თელავში ალაზნის გამზირზე და სასამართლოს მიმდებარედ აღმაშენებლის ქუჩაზე, ასევე სხვა ქუჩებზე ახალი ნიაღვარმიმღებების მოწყობაზე 130 000 ლარი დაიხარჯება”, – აცხადებენ თელავის მერიაში.
ამასთან, შეგახსენებთ, რომ თელავის ბიუჯეტიდან წყალმომარაგებაზე 1 267 000, სპორტის განვითარების ხელშეწყობისთვის 599 850, სკოლამდელი განათლებისთვის 4 695 000, სოციალური მიმართულებით 1 760 000, ხოლო, დასუფთავების ღონისძიებებზე 833 000 ლარი დაიხარჯება.
