გორის ბაზრის ადმინისტრაცია მოვაჭრეებისთვის ცნობებს გასცემს

472

გორის აგრარული ბაზრის “გეორგია XXI” მოვაჭრეები დირექციისგან ცნობებს მიიღებენ, რომლის საშუალებითაც შეეძლებათ სახელმწიფო დახმარების მიღება, – ინფორმაცია ბაზრის ადმინისტრაცია ავრცელებს. ამის შესახებ რადიო მოზაიკა წერს. 

ბაზრის ხელმძღვანელის ნუგზარ აწკარუნაშვილის თქმით, ის ელოდება მთავრობის გადაწყვეტილებას, რის შემდეგაც ადამიანები, ვინც ბაზარში არიან დასაქმებულები, ხელმძღვანელობისგან მიიღებენ ცნობებს.

“ჩვენთან დასქმებული ადამიანები, რა თქმა უნდა მიიღებენ ცნობას, რომ სახელმწიფოსგან მიიღონ დახმარება. ველოდებით მთავრობის გადაწყვეტილებას და ჩვენც შესაბამისად ვიმოქმედებთ“, ამბობს ნუგზარ აწკარუნაშვილი.

როგორც ცნობილია, იმისათვის, რომ თვითდასაქმებულებმა სახელმწიფოსგან დახმარება მიიღონ, აუცილებელია წარადგინონ ცნობა იურიდიული პირისგან, რომელიც დაადასტურებს, რომ ის ნამდვილად დასაქმებულია.

2020 წლის 27 აპრილიდან ღია ტიპის აგრარული ბაზრების ფუნქციონირება შესაძლებელი გახდა.

ამასთან, გარემოს დაცვისა და სოფლის მეურნეობის მინისტრის თქმით, საქართველოში მოქმედი 80 აგრარული ბაზრიდან უმრავლესობა მოთხოვნებს ვერ აკმაყოფილებს და არ უნდა იყოს მოლოდინი, რომ შეზღუდვების მოხსნის შემდეგ ყველა იმუშავებს.

ლევან დავითაშვილის თქმით, რეგიონებსა და თბილისში აგრარული ბაზრების აღდგენა ეტაპობრივად, სურსათის ეროვნული სააგენტოსა და რეგიონული შტაბების კოორდინაციით მოხდება.

ახალი კორონავირუსის გავრცელების გამო 21 მარტს საქართველოში საგანგებო მდგომარეობა, ხოლო 31 მარტიდან კარანტინი გამოცხადდა. საგანგებო მდგომარეობა ქვეყანაში 22 მაისამდეა დაწესებული.

კარანტინის ფარგლებში სრულად იკრძალება ნებისმიერი ტიპის საზოგადოებრივი ტრანსპორტით, მათ შორის, მეტროთი, გადაადგილება. 21 საათიდან დილის 6 საათამდე კი ქვეყნის მასშტაბით კომენდანტის საათი მოქმედებს, რის გამოც გადაადგილება ეზღუდება როგორც ქვეითად, ისე ტრანსპორტით მოსიარულეებს. მათთვის კი, ვისი მუშაობაც ამ პერიოდში აუცილებელია, გადაადგილება სპეციალური საშვებით მოხდება. ყველა მოქალაქეს ქუჩაში გადაადგილებისას, დღის ნებისმიერ დროს, თან უნდა ჰქონდეს პირადობის დამადასტურებელი დოკუმენტი.

სასურსათო მაღაზიებსა და აფთიაქების გარდა, საქართველოში 3 პირზე მეტის შეკრება აიკრძალა. ამასთან, დახურულ საჯარო სივრცეში პირბადეების ტარება სავალდებულო გახდა.

COVID-19-ის აფეთქება ჩინეთში 2019 წლის დეკემბერში დაიწყო და დღეისათვის ის მსოფლიოს 212 ქვეყანაშია გავრცელებული.  ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. ამ დროისთვის კორონავირუსი განსაკუთრებით ევროპის კონტინენტზე მძვინვარებს. საქართველოში ამჟამად COVID-19-ით ინფიცირების 639 შემთხვევაა დაფიქსირებული, საიდანაც 349 უკვე გამოჯანმრთელდა, 11 ადამიანი კი გარდაიცვალა.