ქუთაისის საფეხბურთო კლუბ „ტორპედოში“ ინვესტიციას, სავარაუდოდ, იტალიელები განახორციელებენ. ინფორმაციას ქუთაისიპოსტი ავრცელებს.
როგორც ქუთაისის მერიაში აცხადებენ, ინვესტორებთან მოლაპარაკება დასკვნით ეტაპზეა. ბოლო შეხვედრა იტალიელებთან კვირის დასაწყისში შედგა. მოლაპარაკების შედეგები, სავარაუდოდ, უახლოეს დღეებში გახდება ცნობილი.
“ამ დღეებში გავაკეთებთ განცხადებას“,- ამბობს მერის მოადგილე, იუზა უგულავა.
რაც შეეხება კლუბის ყოფილ ინვესტორს, ზაალ ჩაჩავას, მერის მოადგილე უარყოფს ინფორმაცია იმის შესახებ, რომ ჩაჩავა ვალის აღიარებაზე უარს ამბობს.
“სასამართლო პროცესი შედგება და აღიარებს რა თქმა უნდა“,- აცხადებს იუზა უგულავა.
“ტორპედოს“ პოტენციურ ინვესტორად გერმანული “აიტრახტიც“ განიხილებოდა, რომელიც ქუთაისის მერიას კლუბის 20 წლიანი იჯარით აღებას სთავაზობდა, თუმცა, საბოლოოდ მოლაპარაკება არ შედგა.
ქუთაისის „ტორპედო“ ოთხი თვეა ინვესტორის გარეშეა. ზაალ ჩაჩავამ, რომელმაც კლუბი 2017 წელს, აუქციონზე 300 000 ლარად შეიძინა, გუნდი ფინანსური კრიზისის გამო დატოვა.
