“შენების მოძრაობის” ლიდერმა დავით უსუფაშვილმა ბრიფინგი გამართა და საარჩევნო სისტემის ცვლილებებზე და პარლამენტის წინ მიმდინარე აქციაზე ისაუბრა.
უსუფაშვილის თქმით, არც ერთი ოპოზიციური ძალა არ უნდა წამოეგოს “ქართული ოცნების” ზაფანგზე და არავითარ შემთხვევაში არ უნდა მოვხსნათ პროპორციული არჩევნების მოთხოვნა.
“ტყუილი, მანიპულაციები და სპექტაკლების დადგმა იქცა ხელისუფლების ხასიათის თვისებად. დღეს პასუხია გასაცემი კითხვაზე – ხალხის სამართლიან აღშფოთებას რას ეუბნება “ქართული ოცნება” და რაზე გველაპარაკება? კრიზისიდან გამოსავალზე ფიქრობს, თუ მას აქვს განზრახული შემდეგი მზაკვრული ნაბიჯი, რომ პროპორციული არჩევნების მოთხოვნა გაწიოს გვერდზე, თავად ილაპარაკოს, რომ ჩვენ ამაზე არ წამოვალთ, შეუწყოს ხელი ოპოზიციის რადიკალიზაციას, მოსახლეობის კიდევ უფრო გადარევას და ამ არეულობის ფონზე არსებული სისტემით ვადამდელი არჩევნების ჩატარებას. ეს ხომ არ იმალება მათ ამ დამოკიდებულებებში და ამ გაცხადებების მიღმა? მე არ გამოვრიცხავ, რომ ოპოზიციის მხარეს, ამავე მოდელს ჰყავდეს მხარდამჭერები. ამიტომ ჩემს ოპოზიციონერ კოლეგებსაც მივმართავ, არავითარ შემთხვევაში არ უნდა წამოეგონ ხელისუფლების ხაფანგზე. არავითარ შემთხვევაში არ უნდა მოვხსნათ პროპორციული არჩევნების მოთხოვნა. ყველაფერი დანარჩენი არის ინსტრუმეტი ამის მისაღწევად,” – აცხადებს დავით უსუფაშვილი.
მან “ქართულ ოცნებას” მოუწოდა მიიღონ ოპოზიციის მიერ შეთავაზებული “გერმანული მოდელი”.
სამი დღეა, პარლამენტთან საპროტესტო აქციები მიმდინარეობს. ოპოზიცია და სამოქალაქო საზოგადოება ვადამდელ არჩევნებს გერმანული მოდელით, დროებით მთავრობას და ცესკოს განახლებულ შემადგენლობას ითხოვს.
პარლამენტის შენობა ბლოკირებულია. აქციის მონაწილეები ამბობენ, რომ არ შეუშვებენ არც ერთ დეპუტატს. შესასვლელებში გაიშალა კარვები და ჩააწყეს ქვიშის ტომრები, “ევროპულმა საქართველომ” ყველა შესასვლელ ჭიშკარს სიმბოლურად ბოქლომი დაადო.
აქცია თბილისის ცენტრალურ ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ 14 ნოემბერს ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო.
