წლის დასაწყისში ვთქვით, რომ ტურისტული ინფრასტრუქტურის განვითარებით რეგიონებში მიზიდულობის ახალ ცენტრებს შევქმნიდით, – ამის შესახებ პარლამენტში გამოსვლისას რეგიონული განვითარებისა და ინფრასტრუქტურის მინისტრობის კანდიდატმა მაია ცქიტიშვილმა განაცხადა.
როგორც ცქიტიშვილმა აღნიშნა, ქუთაისისთვის ძალიან მნიშვნელოვანი – ისტორიული უბნის მშენებლობა-რეაბილიტაციის პროექტირებაა დაწყებულ და სხვადასხვა ეტაპზეა დუშეთის, თელავის, ასურეთის, მესტიაში ლაღამის უბნის, უშგულის, აბასთუმნის, სტეფანწმინდის, გორის, ველისციხის, ბაკურიანის, ბახმაროსა და სხვა დასახლებების ცენტრალური თუ ისტორიული უბნების აღდგენა-რესტავრაციის პროექტები.
ცქიტიშვილის თქმით, 2019-2021 წლებში ეტაპობრივად დასრულდება ვანის, ონის, ბორჯომის, სტეფანწმინდას, მცხეთის მუზეუმების პროექტირება და მშენებლობა.
აგრეთვე, გაგრძელდება ტურისტული ინფრასტრუქტურის მოწყობის პროექტები კულტურული მემკვიდრეობის ძეგლებთან, სამთო-სათხილამურო კურორტებზე, სანაპირო ზოლზე, ტურისტულ ცენტრებში.
მინისტრობის კანდიდატის თქმით, ძირითადი ინფრასტრუქტურის განვითარების გარდა, სამინისტროს პრიორიტეტად რჩება რეგიონებში ისეთი პროექტების განხორციელება, რომლებიც შექმნის მოსახლეობისთვის ღირსეული ცხოვრების პირობებს, გააძლიერებს რეგიონებს ეკონომიკურად და ხელს შეუწყობს ქალაქსა და რეგიონებს შორის არსებული უთანაბრობის აღმოფხვრას.
“მნიშვნელოვნად – 46%-ით გაიზარდა მუნიციპალური განვითარების ფონდის ბიუჯეტი, პროექტების მიმართულებები და პროექტების რაოდენობა“, – აღნიშნა ცქიტიშვილმა.
