გამოვდივართ ინიციატივით, რომ 2020 წელს საპარლამენტო არჩევნები პროპორციული წესით და ნულოვანი ბარიერით ჩატარდეს, – ამის შესახებ “ქართული ოცნების” ლიდერმა, ბიძინა ივანიშვილმა სპეციალურ ბრიფინგზე განაცხადა.
მისი თქმით, მიუხედავად იმისა, რომ შერეული სისტემა დემოკრატიულია, მოცემულ ვითარებაში პარტიამ აღნიშნული გადაწყვეტილება მიიღო, რადგან ვეღარ პასუხობს ქვეყანაში არსებულ გამოწვევებს, მათ შორის მზარდ გლობალურ პოლიტიკურ და ეკონომიკურ გამოწვევებს.
ივანიშვილის განცხადებით, შუალედურმა არჩევნებმა აჩვენა, რომ მაჟორიტარულ არჩევნებში მმართველი პარტიის კანდიდატები უპირობოდ იმარჯვებენ, ამიტომაც, შესაძლებელია, პარტიისთვის ეს მოცემულობა საუკეთესო იყოს, თუმცა, გარემოებები იცვლება და სწორედ ამ გარემოებების გათვალისწინებით, ქართულმა ოცნებამ მაჟორიტარულ სისტემაზე უარი თქვა.
“2020 წელს მივიღებთ პარლამენტს, რომელშიც თითქმის ყველა პოლიტიკური აქტორი იქნება წარმოდგენილი და აღარავის დასჭირდება რომელიმე პოლიტიკურ გუნდთან მიტმასვნა და საკუთარ პრინციპებზე უარის თქმა”, – განაცხადა ივანიშვილმა.
აღნიშნულ ინიციატივაზე მსჯელობას საქართველოს პარლამენტი მომავალი კვირიდან დაიწყებს. აღნიშნული ცვლილება საკონსტიტუციო ცვლილებებს მოითხოვს, რასაც შესაბამისი ვადები და პროცედურები აქვს. მმართველი პარტია ვარაუდობს, რომ პარლამენტი ამ ცვლილებებს საშემოდგომო სესიაზე მიიღებს.
„ქართული ოცნება – დემოკრატიული საქართველოს“ თავმჯდომარის, ბიძინა ივანიშვილის განცხადება
პოლიტიკური გაერთიანება „ქართული ოცნება – დემოკრატიული საქართველოს“ თავმჯდომარის, ბიძინა ივანიშვილის განცხადებაპოლიტიკური გაერთიანება „ქართული ოცნება – დემოკრატიული საქართველო“, ფართომასშტაბიანი პოლიტიკური რეფორმის ინიციატივით გამოდის:2020 წლის საპარლამენტო არჩევნები ჩატარდეს პროპორციული სისტემით, ნულოვანი, ვიმეორებ, ნულოვანი საარჩევნო ბარიერის პირობებში.საზოგადოებას მოეხსენება, რომ სწორედ „ქართული ოცნება“ იყო იმ საკონსტიტუციო რეფორმის ინიციატორი, რომლის ფარგლებშიც გადაწყდა, რომ საპარლამენტო დემოკრატიის პირობებში, არჩევნების პროპორციული სისტემა უკეთ პასუხობს ხელისუფლებაში მრავალპარტიული და, შესაბამისად, პლურალისტური პოლიტიკური წარმომადგენლობის ევროპულ სტანდარტს.თუმცა, იქვე დადგინდა, რომ ამ საარჩევნო სისტემაზე გადასვლა უფრო სწორი, 2024 წელს იქნებოდა, რადგან პარტიების გაძლიერებას, მათ კრისტალიზაციას ღირებულებების გარშემო, მეტ კონსოლიდაციას და კონკურენტუნარიანობის გაზრდას გარკვეული წლები კიდევ სჭირდებოდა. სწორედ ამიტომ განისაზღვრა, კონსტიტუციით გარანტირებული საარჩევნო რეფორმის ოპტიმალურ ვადად 2024 წელი, მითუმეტეს იმ პირობებში, როდესაც დღეს მოქმედი შერეული საარჩევნო სისტემა არის აბსოლუტურად დემოკრატიული, გამართული და აპრობირებულია არაერთ ტრადიციული დემოკრატიის ქვეყანაში.მაგრამ ცხოვრებას თავისი კორექტივები შეაქვს ყველაფერში და ნებისმიერი პასუხისმგებლიანი მმართველი პოლიტიკური ძალის ვალია, იყოს ადეკვატური ქვეყნის წინაშე მდგარი გამოწვევებისა და, რაც მთავარია, ესმოდეს საზოგადოების მაჯისცემა.დღეს ყველა ვხედავთ, რომ საზოგადოება ცვლილებებს ითხოვს. ჩვენი ინციატივა კი, სწორედ ფართომასშტაბიანი პოლიტიკური ცვლილების საფუძველს იძლევა.იმავდროულად, საზოგადოებრივ მოთხოვნას უნდა მოჰყვეს და, დარწმუნებული ვარ, მოჰყვება კიდეც, სამართლებრივი შედეგებიც.უნდა დაისაჯოს ის, ვინც მასობრივი ძალადობის ორგანიზება მოახდინა და ისიც, ვინც ძალას გადაამეტა.რაც შეეხება დღევანდელ პოლიტიკურ გადაწყვეტილებას. უპირველესი მიზეზი, რამაც ამისკენ გვიბიძგა, არის ჩვენი საზოგადოების და, განსაკუთრებით, ახალგაზრდობის სურვილი და მზაობა, აქტიურად ჩაერთოს ქვეყნის მართვაში და საკუთარ თავზე აიღოს პასუხისმგებლობა.საზოგადოების ამ სულისკვეთებასთან თანხვედრაშია ჩვენი პოლიტიკური გუნდის სურვილიც, ნებაყოფლობით ვთქვათ უარი იმ სასტარტო უპირატესობაზე, რაც შერეული საარჩევნო სისტემის პირობებში ბუნებრივად გააჩნია „ქართულ ოცნებას“.შუალედური არჩევნების შედეგებმა ყველა დაარწმუნა, რომ ქართული ოცნების ნებისმიერი კანდიდატი პრაქტიკულად უკონკურენტოა. ფაქტია, რომ პოპულარულ ადამიანებს კვლავ „ქართული ოცნების“ ეგიდით სურთ პოლიტიკურ ასპარეზზე გამოსვლა და თუ 2020 წლის საპარლამენტო არჩევნები შერეული სისტემით ჩატარდა, მაღალი ალბათობით, „ქართული ოცნება“ თითქმის ყველა მაჟორიტარულ ოლქს მოიგებს, რითაც უკიდურესად შეამცირებს მრავალპარტიული პარლამენტის ფორმირების რესურსს. ეს, შესაძლოა, ემსახურებოდეს ჩვენს პარტიულ ინტერესს, მაგრამ ვეღარ პასუხობს ქვეყნის წინაშე არსებულ გამოწვევებს.და კიდევე ერთი მიზეზი, რაც საფუძვლად დაედო ჩვენს დღევანდელ გადაწყვეტილებას, არის ის მზარდი, გლობალური თუ ლოკალური ხასიათის, პოლიტიკური და ეკონომიკური გამოწვევები, რომლის წინაშეც დგას ჩვენი ქვეყანა და რომლებთანაც გამკლავებას სულ უფრო ხშირად დასჭირდება ფართო საზოგადოებრივი და პოლიტიკური კონსენსუსი, ერთიანობა და პასუხისმგებლობის გაზიარება, რაც მხოლოდ მაქსიმალურად პლურალისტურ გარემოშია შესაძლებელი;ამიტომ, ჩვენ გთავაზობთ, პროპორციულ საარჩევნო სისტემაზე გადასვლას. იმავდროულად, ნულზე ჩამოგვყავს, ანუ სრულად ვაუქმებთ დღეს არსებულ პროცენტულ ბარიერს და იმედი გვაქვს, რომ ამ გზით, 2020 წელს მივიღებთ პარლამენტს, სადაც თითქმის ყველა პოლიტიკური აქტორი და ამ ქვეყნის მთელი ინტელექტუალური პოტენციალი იქნება წარმოდგენილი. არავის დასჭირდება ვინმესთან მიკედლება, ხელოვნური გაერთიანება და ხშირად საკუთარ პრინციპებზე უარის თქმა, რათა თავისი წვლილი შეიტანოს ქვეყნის განვითარებასა და წინსვლაში.ჩვენი პოლიტიკური გუნდი მზადაა, მიმდინარე სასესიო კვირის დასრულებისთანავე, დაიწყოს ფართო კონსულტაციები, საპარლამენტო და არასაპარლამენტო პოლიტიკურ პარტიებთან. ყველასთნ, ვინც მზად არის კონსტიტუციისა და კანონის უპირობო პატივისცემის ფარგლებში ეწეოდეს აქტიურ პოლიტიკურ საქმიანობას.
Posted by ქართული ოცნება / Georgian Dream on ორშაბათი, 24 ივნისი, 2019
შეგახსენებთ, რომ დღეს დილიდან “ქართული ოცნების” ცენტრალურ ოფისში უმრავლესობის სხდომა გაიმართა, რომელსაც პარტიის თავმჯდომარე ბიძინა ივანიშვილი ხელმძღვანელობდა. მანამდე პარტია „ქართული ოცნების“ ცენტრალურ ოფისში პოლიტსაბჭოს სხდომა ჩატარდა. სხდომას პირადად პარტიის თავმჯდომარე ბიძინა ივანიშვილი ხელმძღვანელობდა. მასში ასევე მონაწილეობდნენ პრემიერმინისტრი მამუკა ბახტაძე, დედაქალაქის მერი კახა კალაძე, პარლამენტის გადამდგარი თავმჯდომარე ირაკლი კობახიძე და პარტიის სხვა ლიდერები.
როგორც ცნობილია, 20 ივნისის შემდეგ მიმდინარე აქციების მონაწილეების ერთ-ერთი მოთხოვნა 2020 წლის საპარლამენტო არჩევნების პროპორციული წესით ჩატარებაა. ამ მოთხოვნასთან ერთად, აქციის მონაწილეები შინაგან საქმეთა მინისტრის, გიორგი გახარიას გადადგომას და 20 ივნისს დაკავებული ადამიანების გათავისუფლებას ითხოვენ, თუმცა, აღნიშნულ საკითხზე არც პარტიის თავმჯდომარეს და არც სხვა ლიდერებს არ უსაუბრიათ.
