საქართველოს რეგიონული განვითარებისა და ინფრასტრუქტურის სამინისტრომ წალკაში განთიადი-დარაკოვი-არწივანი-კუშის დამაკავშირებელი საავტომობილო გზის რეაბილიტაცია დაასრულა და კუში-ნარდევანის გზის რეაბილიტაციას იწყებს. ინფორმაციას იმედინიუსი ავრცელებს.
განთიადი-დარაკოვი-არწივანი-კუში-ნარდევანის გზა წალკის მუნიციპალიტეტში წრიული მონაკვეთია, რომელიც შემდეგ ცენტრალურ, წალკა-ნინოწმინდა-ახალქალაქისშიდასახელმწიფოებრივ გზას უკავშირდება.
წრიული გზიდან განთიადი-დარაკოვი-არწივანი-კუშის (სოფლის შესასვლელამდე) გზა დასრულებულია. დარჩენილია მხოლოდ კუში-ნარდევანის დაახლოებით 2 კილომეტრიანი მონაკვეთი, რომელზეც მუნიციპალური განვითარების ფონდმა უკვე დაასრულა ტენდერი და მიმდინარეობს სატენდერო შეფასება. კუში-ნარდევანის გზის რეაბილიტაცია ივლისში დაიწყება და წლის ბოლოს დასრულდება.
უკვე რეაბილიტირებული გზა ბეტონის საფარის დაგებამდე გრუნტის იყო, რის გამოც მოსახლეობას, განსაკუთრებით წვიმიან ამინდში, უჭირდა გადაადგილება. პროექტის დასრულების შემდეგ, პრობლემა მოგვარდა.
გზის პროექტის გარდა, მუნიციპალური განვითარების ფონდი, წალკაში წყალმომარაგების სისტემის რეაბილიტაციას ახორციელებს.
