ქუთაისის მერიამ 2021 წლის ბიუჯეტის პროექტი საკრებულოში გადააგზავნა. დაკორექტირების შემდეგ ბიუჯეტის მოცულობა 60 860 500 ლარს შეადგენს. ინფორმაციას რადიო ძველი ქალაქი ავრცელებს.
მერიის საფინანსო პოლიტიკისა და სახელმწიფო შესყიდვების სამსახურის უფროსის, დავით ნიშნიანიძის განცხადებით, თანხები ბიუჯეტში არსებულ სოციალურ პროგრამებს დაემატა. მისივე განმარტებით, საკრებულოდან ტექნიკური ხასიათის შენიშვნები იყო მიღებული, რაც გაითვალისწინეს.
“ბიუჯეტი შესაძლებლობიდან და რესურსიდან გამომდინარე, მაქსიმალურად მოგებულია მოსახლეობის ინტერესებს,”-განაცხადა დავით ნიშნიანიძემ.
2021 წლის ბიუჯეტის პროექტის პრიორიტეტად სოციალური და ინფრასტრუქტურული მიმართულებები დასახელდა.
მერიაში წლის ბოლომდე ბიუჯეტის 78 მილიონამდე ზრდას ვარაუდობენ.
პირველ ეტაპზე საკრებულო ბიუჯეტს კომისიურად განიხილავს. ქალაქის მთავარი ფინანსური დოკუმენტი დასამტკიცებლად საკრებულოს სხდომაზე, სავარაუდოდ, თვის ბოლოს გავა.
ბოიკოტის გამო ბიუჯეტის განხილვაში ოპოზიცია არ მონაწილეობს.
