“პროგრესული საქართველოს” რუსთავის მაჟორიტარი დეპუტატობის კანდიდატის, იურისტი ალექსანდრე კობაიძის განცხადებით, დედამისი რუსთავის #18 სასჯელაღსრულების დაწესებულებიდან პოლიტიკური ნიშნით გაათავისუფლეს.
როგორც კობაიძემ “ინფო რუსთავს” უთხრა, პანდემიის გამო, თინათინ მჭედლიშვილი სხვა ათეულობით თანამშრომელთან ერთად კარანტინში იმყოფებოდა, რა დროსაც მას ციხის დირექტორმა დაურეკა და სამსახურიდან წასვლის შესახებ განცხადების დაწერა მოსთხოვა.
კობაიძე დარწმუნებულია, რომ მისი ოჯახის წევრი მე-18 პენიტენციური დაწესებულების უფროსმა სამსახურიდან სწორედ მისი საქმიანობის გამო გაათავისუფლა.
“ამ ბოლო პერიდში უფრო სისტემატიურად ვამხილე თეა წულუკიანი და მისი ჯალათები. ამან გამოიწვია ის, რომ დედაჩემი პოლიტიკური ნიშნით გაათავისუფლეს, რა თქმა უნდა, ეს ყოველივე არის პასუხი ჩემ პოლიტიკური საქმიანობაზე. ასე მოქმედებს ნებისმიერი დიქტატორული სახელმწიფო”, – ამბობს ალექსანდრე კობაიძე.
კობაიძის ამ ბრალდებებს სპეციალურმა პენიტენციურმა სამსახურმა საგანგებო განცხადებით უპასუხა და სიცრუე უწოდა.
“2020 წლის 8 ოქტომბერს ადვოკატმა ალექსანდრე კობაიძემ სოციალური ქსელის მეშვეობით გაავრცელა ინფორმაცია, თითქოს მის დედას N18 პენიტენციური დაწესებულების ადმინისტრაცია სამსახურის დატოვებას აიძულებს. “დღეს დედაჩემს დაურეკა N18 ციხის დირექტორმა და განუცხადა, რომ განცხადება უნდა დაწეროს სამსახურიდან გათავისუფლების შესახებ”,- წერს კობაიძე.
“სინამდვილეში ალექსანდრე კობაიძის დედას, თ.მ.-ს არავინ აიძულებს სამსახურიდან წასვლას. მას მხოლოდ იმ სამუშაოს შესრულება შეეთავაზა, რასაც მისი პოზიცია ითვალისწინებს და რაზეც მან განაცხადა უარი. კერძოდ, თ.მ. 2017 წლის 10 ივლისიდან დღემდე უკავია N18 პენიტენციური დაწესებულების ადმინისტრაციული განყოფილების დამხმარე მოსამსახურის თანამდებობა. მის ფუნქციებში შედის ელექტროგაყვანილობის, ელექტრომოწყობილობების, სავენტილაციო ძრავების, ასევე საკნებში/პალატებში ელექტრომოწყობილობების, გარე განათების გამართული მუშაობის უზრუნველყოფა და ხარვეზის აღმოფხვრა, ასევე, შედუღება, ინვენტარის შეკეთება, საკანალიზაციო სისტემის გამართული მუშაობა და ა.შ. თუმცა დღემდე იგი ასრულებდა კანცელარიის თანამშრომლის ფუნქციებს და არა იმ მოვალეობებს, რასაც მის მიერ დაკავებული პოზიცია ითვალისწინებდა და რა სამუშაოს შესრულებაზეც დანიშვნის დროს მას ხელი აქვს მოწერილი.
შეგახსენებთ, მიმდინარე წლის 7 აპრილიდან კოვიდ-19-ის შესაძლო გავრცელების პრევენციის მიზნით, პენიტენციური დაწესებულებების ის თანამშრომლები, რომლებსაც პატიმრებთან უშუალო შეხება არ აქვთ (დაწესებულებების კანცელარიის, ბუღალტერიის თანამშრომლები და ა.შ.), დაწესებულებების პერიმეტრის გარეთ, სპეციალურად მათთვის მოწყობილ სამუშაო სივრცეში ასრულებენ სამუშაოს და დადიან მორიგეობით. სამსახურში მყოფი თანამშრომლები ასრულებენ იმათ უფლება-მოვალეობებს, ვინც იმ მომენტისთვის სამსახურში არ იმყოფება. ამ პრინციპიდან გამომდინარე და იმ მიზეზით, რომ თ.მ.-ს არ აქვს კომპიუტერის საოფისე პროგრამებთან მუშაობის უნარები (მუშაობდა მხოლოდ მატერიალური სახით დოკუმენტებთან), შესაბამისად, ვერ შეასრულებდა სამუშაოს დისტანციურად, იგი მიმდინარე წლის მარტის ბოლოდან სამსახურში არ გამოცხადებულა. ამჟამად კი, ვინაიდან N18 პენიტენციურ დაწესებულებაში დგას ადმინისტრაციული განყოფილების დამხმარე მოსამსახურის საჭიროება, თ.მ.-ს შეეთავაზა მისი პოზიციით გათვალისწინებული საქმიანობის განხორციელება, რაზეც მან განაცხადა უარი იმ მოტივით, რომ ამ საქმის შესრულება არ შეუძლია. ამასთან, მას დაკავებული თანამდებობიდან წასვლის შესახებ განცხადებით დაწესებულების ადმინისტრაციისთვის არ მიუმართავს. ამიტომ მასზე ზეწოლა და მისი სამსახურიდან წასვლის იძულება არის სრული სიცრუე და ადვოკატ კობაიძის მიერ პენიტენციური სამსახურის მიმართ გამოთქმული მორიგი ცრუ ბრალდება”, – აცხადებენ პენიტენციურ სამსახურში.
ალექსანდრე კობაიძე ფაქტზე რეაგირებისთვის სახალხო დამცველს მიმართავს.
