კოსტავას ქუჩაზე, ცირკის მიმდებარე ტერიტორიაზე სკვერი ეწყობა

860

მთაწმინდის რაიონის გამგეობა კოსტავას ქუჩაზე, ცირკის მიმდებარე ტერიტორიაზე სკვერის მოწყობის სამუშაოებს ახორციელებს.

პროექტის შედეგად, ტერიტორიაზე LED განათების ქსელი, საფეხმავლო ბილიკები და საპარკე სკამები მოეწყობა. ასევე, სკვერში ეკოლოგიურად სუფთა მასალისგან დამზადებული ატრაქციონები განთავსდება. აღნიშნულ ტერიტორიაზე გამწვანების სამუშაოებიც ჩატარდება. დაირგვება სხვადასხვა სახეობის ხე-მცენარე, მოეწყობა სარწყავი სისტემა და ჰიდროთესვის პრინციპით ბალახი დაითესება.

მიმდინარე სამუშაო პროცესს მთაწმინდის რაიონის გამგებელი, დავით კირკიტაძე გაეცნო.

„ჩვენი ერთ-ერთი ძირითადი მიმართულება რეკრეაციული და გასართობი სივრცეების მოწყობაა. აღნიშნულ ტერიტორიაზე წლების განმავლობაში გაურკვევი რეკონსტრუქცია იდგა. სულ მალე კი, ადგილობრივ მოსახლეობას ლამაზი სკვერი ექნება, სადაც ბავშვები გაერთობიან, ხოლო უფროსი ასაკის ადამიანები დაისვენებენ. მთაწმინდის რაიონში პარალელურად სამ სკვერს აწყობენ, სამუშაოები ნოემბერში დასრულდება“, – განაცხადა დავით კირკიტაძემ.

ინფრასტრუქტურულ პროექტს კონტრაქტორი კომპანია ასრულებს, რისთვისაც ადგილობრივი ბიუჯეტიდან  126 120 ლარია გამოყოფილი.