ზუგდიდში „ევროპული საქართველოს“ მაჟორიტარი დეპუტატობის კანდიდატმა, გიგი უგულავამ, 6 სექტემბერს სოხუმის ქუჩაზე საგანგებო ბრიფინგი გამართა.
მისი თქმით „ქართული ოცნების“ მაჟორიტარი დეპუტატობის კანდიდატის, ირაკლი ჩიქოვანის შტაბმა, გიგი უგულავას საარჩევნო პლაკატებს ჩიქოვანის პლაკატები გადააკრა. უგულავამ აღნიშნული ზუგდიდში პრემიერ-მინისტრ გიორგი გახარიას სტუმრობას დაუკავშირა.
„დღეს ზუგდიდს სტუმრობს ბატონი გახარია და მთელი ღამის განმავლობაში და ამ ვაჟბატონის, თანამედროვე კომკავშირელის შტაბმა გადაწყვიტა მისთვის საჩუქარი მიეძღვნა და იქ სადაც გახარია გაივლის, ჩემს პლაკატებს გადააკრეს ბატონი ჩიქოვანის პლაკატები. ეს შევარდნაძისდროინდელი მეთოდია. ველურობას ველურობით არ ვუპასუხებთ“, – განაცხადა უგულავამ.
უგულავამ ადგილზე კარიკატურული პლაკატები გააკრა, ხვალ კი, მომხდარ ფაქტთან დაკავშირებით, ზუგდიდის საოლქო საარჩევნო კომისიაში განცხადების შეტანას გეგმავს.
