ოპოზიციურ გაერთიანებას „ძალა ერთობაშია“ პარტია „პროგრესი და თავისუფლება“ შეუერთდა. მემორანდუმს გრიგოლ ვაშაძემ და კახა ოქრიაშვილმა მოაწერეს ხელი.
კახა ოქრიაშვილთან ერთად, პარტია „პროგრესი და თავისუფლების“ წევრია ბიზნესმენი და ხელისუფლების ყოფილი მაღალჩინოსანი ცეზარ ჩოჩელი.
„დღეს ხელს ვაწერთ და ვუერთდებით საარჩევნო ბლოკს „ძალა ერთობაშია“, ფართო კოალიციით მოვდივართ ხელისუფლებაში. ჩვენი პარტია „პროგრესი და თავისუფლება“ იქნება გარანტი იმისა, რომ საქართველოში შეიქმნება მსოფლიოში საუკეთესო ბიზნესგარემო. ჩვენ ვიქნებით გარანტი, საქართველოში დავამარცხოთ სიდუხჭირე და მყისიერად შევქმნათ ძალიან ბევრი სამუშაო ადგილი“, – განაცხადა პარტია „პროგრესი და თავისუფლების“ ლიდერმა, კახა კახა ოქრიაშვილმა.
მისივე თქმით, ის 2020 წლის საპარლამეტნო არჩევნებში მაჟორიტარული წესით მიიღებს მონაწილეობას და სავარუდოდ, კენჭს ისევ ბოლნისი-დმანისი-თეთრიწყარო-წალკის მაჟორიტარულ ოლქში იყრის.
როგორც ოქრიაშვილმა განაცხადა, უერთდება საარჩევნო ბლოკ „ძალა ერთობაშიას“ და ეს საქართველოში სიდუხჭირის დამარცხების გარანტი იქნება.
„თუ რომელიმე პოლიტიკურ პარტიასთან აქამდე მაკავშირებდა ურთიერთობა ამას დავარქმევდი მოკავშირეობას და არა წევრობას. მხოლოდ 2 დღეა გავხდი პარტიული და წარმოვადგენ პარტიას პროგრესი და თავისუფლება.
გვიერთდება ცეზარ ჩოჩელი და დილარ ხაბულიანიც. ვიქნები მაჟორიტარი დეპუტატობის კანდიდატი დმანისი, წალკის, ბოლნისი, თეთრიწყაროს ოლქში ძალა ერთობაშიას რიგებიდან“, – განაცხადა კახა ოქრიაშვილმა.
კახა ოქრიაშვილი 2004 წლიდან პარლამენტის წევრია. 2016 წლამდე ის „ნაციონალური მოძრაობის“ დეპუტატი იყო, 2016 წლის საპარლამენტო არჩევნებზე კი „ქართული ოცნების“ მაჟორიტარად იყარა კენჭი.
