დავითულიანი: მას შემდეგ, რაც კახა ოქრიაშვილი ოპოზიციაში წავიდა, რატომღაც დმანისში დაპირისპირებები მუდმივად ხდება

229

ვფიქრობ, კარგად არის გამოსაძიებელი, რატომ ხდება და ვის აწყობს დმანისში ამ დაძაბულობის კერების შექმნა. ამას ბოლომდე უნდა ჩავყვეთ და ჯამურად, მთლიანი სურათი უნდა დავინახოთ. გარდა იმისა, რომ დამნაშავე, არ აქვს მნიშვნელობა, რომელ მხარეს წარმოადგენს, ცალსახად დასასჯელია, – ამის შესახებ პარლამენტის ფრაქცია „ქართული ოცნების“ თავმჯდომარის მოადგილემ, ბექა დავითულიანმა „ქრონიკაში“ ჩართვისას განაცხადა.

იგი დმანისში განვითარებულ მოვლენებს გამოეხმაურა. მისი თქმით, წინასაარჩევნო პერიოდში დანაშაულამდე და დაპირისპირებამდე საქმე არ უნდა მიდიოდეს, თუმცა დავითულიანის განმარტებით, არსებული გარემოებები მკაფიოდ არის დასანახი.

„ბოლო ორი არჩევნებია, კონკრეტულად მას შემდეგ, რაც კახა ოქრიაშვილი ოპოზიციაში წავიდა, რატომღაც დმანისში დაპირისპირებები მუდმივად ხდება. ამ დაპირისპირებებში რატომღაც, როდესაც არასდროს არაფერში სჭირდება ხელისუფლებას, მათ შორის დმანისში, დაძაბულობა და მმართველ გუნდს მშვიდი კამპანია გვინდა, რატომღაც ხდება ისე, რომ ვითარება იძაბება და საქმე დანაშაულამდე მიდის“, – განაცხადა დავითულიანმა.

ცნობისთვის, შინაგან საქმეთა სამინისტრომ დმანისის მუნიციპალიტეტში „ერთიანი ნაციონალური მოძრაობის“ მხარდამჭერების დაჭრის ფაქტზე „ქართული ოცნების“ მაჟორიტარობის კანდიდატის მიხეილ დაუთაშვილის შვილი დავით დაუთაშვილი დააკავა. როგორც უწყების ინფორმაციაშია აღნიშნული, ბრალდებულმა წინასაარჩევნო შეხვედრაზე მომხდარი სიტყვიერი და ფიზიკური დაპირისპირებისას, დანის გამოყენებით სახის არეში დაზიანებები მიაყენა პარტია “ერთიანი ნაციონალური მოძრაობის” მხარდამჭერებს. ამასთან, „ქართული ოცნების“ დმანისის მაჟორიტარობის კანდიდატმა მიხეილ დაუთაშვილმა განაცხადა, რომ მის შვილს ფსიქიკური პრობლემები აქვს.