„ინფრასტრუქტურის სამინისტრომ შარშან პირველად დაიწყო მასშტაბურად ახალი სკოლების მშენებლობა და არსებული სკოლების რეაბილიტაცია. მთლიანობაში, ჩვენ გვაქვს 66 ახალი სკოლის მიმდინარე მშენებლობის, 200-ზე მეტი სკოლის რეაბილიტაციის და 47 ახალი ბაღის მშენებლობის პროექტები,“- ამის შესახებ საქართველოს ვიცეპრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა თეთრიწყაროსა და გარდაბნის მუნიციპალიტეტებში საგანმანათლებლო ინფრასტრუქტურის მიმდინარე სამუშაოების დათვალიერებისას განაცხადა.
როგორც სამინისტროში აცხადებენ, ახალი სასწავლო წლის დაწყებამდე თეთრიწყაროს მუნიციპალიტეტის სოფელ ჯვარაში, სოფელ საღრაშენსა და სოფელ ანაგეთში დასრულდება 60 მოსწავლეზე გათვლილი საჯარო სკოლების მშენებლობა. მათი ინფორმაციით, სამივე სკოლის მშენებლობას სახელმწიფო ბიუჯეტიდან 3.1 მილიონ ლარზე მეტი მოხმარდა. უწყების შეფასებით, სკოლები, რომლებშიც ბავშვები სწავლობდნენ არის ძველი და არ შეესაბამება არანაირ საგანმანათლებლო სტანდარტს. ასევე, ფაქტობრივად დასრულებულია გარდაბნის მუნიციპალიტეტის სოფლების გამარჯვებისა და კუმისის 110 და 90 ბავშვზე გათვლილი საბავშვო ბაღების მშენებლობა, წესრიდგება ბაღების ეზოებიც.
„ქვემო ქართლში 16 ახალი სკოლის მშენებლობა-რეაბილიტაცია მიმდინარეობს. ჯამში, ეს დაახლოებით 40 მილიონი ლარის ღირებულების პროექტებია. ვაშენებთ როგორც მცირე 60 -ბავშიან, ისე 250 ბავშვიან დიდ სკოლებს. ეს ყველაფერი საშუალებას მოგვცემს, რომ განათლების რეფორმის ფარგლებში ბევრად უფრო კარგი გარემო შევთავაზოთ მოსწავლეებს, რაც მათი სწავლის ხარისხზეც აისახება. გარდაბნის მუნიციპალიტეტში გვაქვს 2 ბაღის პროექტი, თეთრიწყაროს მუნიციპალიტეტში კი 4 სკოლა შენდება ერთდროულად, რაც ერთი მუნიციპალიტეტის ფარგლებში ხელშესახები შედეგია“, – აღნიშნა მაია ცქიტიშვილმა.
სამინისტროს ცნობით, ვიცე-პრემიერმა თეთრიწყაროსა და გარდაბნის მუნიციპალიტეტების წყალმომარაგების პრობლემაზეც ისაუბრა.
მისი თქმით, წყალმომარაგების კუთხით არსებული გამოწვევი მიზეზები არსებობს ათწლეულების განმავლობაში. თუმცა, ორივე მუნიციპალიტეტში დაწყებულია არაერთი პროექტი სოფლებისთვის წყლის მიწოდების გასაუმჯობესებლად.
„ძალიან დიდი და რამდენიმე ეტაპიანი პროექტები გვაქვს დაწყებული ქვემო ქართლში, რომელთა შედეგად მოსახლეობას, ზოგან პირველადაც კი, გამართული წყალმომარაგება ექნება. მათ შორის, არის გარდაბნის მუნიციპალიტეტი, სადაც 5 დიდი სოფლის წყალმომარაგების პროექტს ვახორციელებთ. გარდა ამისა, ორივე მუნიციპალიტეტში ბევრი სხვადასხვა წყაროდან – ეს იქნება მუნიციპალური განვითარების ფონდი, გაერთიანებული წყალმომარატების კომპანია, ადგილობრივი თვითმმარველობის ბიუჯეტი თუ რეგიონებში განსახორციელებელი ფონდი, ფინანსდება სხვადასხვ ზომის პროექრტი. მათი დასრულების შემდეგ, ბევრად მეტ ადამიანს ექნება წვდომა უწყვეტ წყალმომარაგებაზე“,- განაცხადა მაია ცქიტიშვილმა.
რეგიონული განვითარებისა და ინფრასტრუქტურის სამინისტროს ცნობით, ამ დროისთვის, ქვემო ქართლში, გაერთიანებული წყალმომარაგების კომპანია ოთხ პროექტს ახორციელებს. აქტიურად მიმდინარეობს მარნეულის წყალარინების გამწმენდი ნაგებობის, მარნეულის წყალმომარაგება-წყალარინების სისტემების, ბოლნისის კოლექტორისა და წყალარინების სისტემის მშენებლობა.
ასევე, გარდაბნის მუნიციპალიტეტის ხუთი სოფლის წყალმომარაგების I ეტაპის სამშენებლო სამუშაოები და ქალაქ მარნეულში, იალღუჯის დასახლებაში წყალსადენისა და წყალარინების გარე ქსელების მოწყობა.
