კასპში ჯერ არდაწყებული 1 მლნ-იანი პროექტის გარშემო დაპირისპირებაა. სამი სოფლის: დოესის, თეძმისხევისა და ერთაწმინდის წყალმომარაგების საქმეზე მერიას უჩივიან. 8-წევრიანმა კომისიამ ინჟინრის დიპლომი არ აღიარა, ხოლო კომპანიას დისკვალიფიკაცია მისცა. ამის შესახებ შიდა ქართლის საინფორმაციო ცენტრი წერს.
მერის მოადგილემ, ზაზა მარიდაშვილმა და დანარჩენმა 7-მა ადამიანმა ინჟინერ-პროფესორის, გიორგი ახვლედიანის დიპლომი დაიწუნა. ასისტენტ-პროფესორი ახვლედიანი საქართველოს ტექნიკური უნივერსიტეტის ასისტენ-პროფესორია და ლექციებს ატარებს.
საქმე იმაშია, რომ ასისტენტ-პროფესორი კომპანია ,,ჰიდრო ემ”-ის თანამშრომელია.
ეს ის კომპანიაა, რომელიც ტენდერისდან მოხსნეს, სწორედ, იმის გამო, რომ მისი თანამშრომლის დიპლომი არ აღიარეს.
კომპანიის წარმომადგენელი, გიორგი ბურკიაშვილი საჩივარში აღნიშნავს, რომ ,,ჰიდრო ემს” დავალდებული ჰქონდა პერსონალის გამოცდილების შესახებ, კერძოდ საინჟინრო განათლების დამადასტურებელი დიპლომების ასლების, კერძოდ უმაღლესი განათლების დამადასტურებელი დოკუმენტის წარდგენა.
,,ყურადღებას ვამახვილებთ იმ გარემოებაზე, რომ მოთხოვნილი იყო საინჟინრო განათლების დამადასტურებელი დოკუმენტაცია. ჰიდროინჟინრის კვალიფიკაციის შესახებ ჩანაწერის გაკეთება დიპლომში არ ხდება, დიპლომში მიეთითება მხოლოდ იმ ფაკულტეტისა და პროგრამის შესახებ, რომელშიც ერთიანდება ესა თუ ის ვისწრო სპეციალობა. მაგალითისთვის, საქართველოს ტექნიკური უნივერსიტეტის სამშენებლო ფაკულტეტზე იმ პირს, ვინც დაასრულებს ჰიდროინჟინერიის სადოქტორო პროგრამას, ენიჭება ინჟინერიის დოქტორის კვალიფიკაცია მშენებლობაში. მოცემულ შემთხვევაშიც ინჟინერიის დოქტორის კვალიფიკაცია გიორგი ახვლედიანის დიპლომში მოიაზრებს სწორედ იმას, რომ მას გავლილი აქვს ჰიდროინჟინერიის სადოქტორო პროგრამა და ფლობს იმ ცოდნას, რასაც უნდა ფლობდეს ჰიდროინჟინერი.” – აღნიშნავს კომპანიის დირექტორი.
კომპანიის წარმომადგენელმა მერიას ასისტენტ-პროფესორის, გიორგი ახვლედიანის დიპლომის დანართიც გაუგზავნა.
“დოკუმენტში მითითებულია, რომ მას აქვს ჰიდროინჟინერიაში უახლეს მიღწევებზე დამყარებული ცოდნა; აქვს მშენებლობის ინჟინრული მომზადების, ახალი სახეობის სამშენებლო მასალების დამზადებისა და ჰიდროსაინჟინრო სამუშაოების წარმოების ტექნოლოგიების უახლეს მიღწევებზე დამყარებული თეორიული ცოდნა; აქვს ჰიდროტექნიკური, სამდინარო და საზღვაო ნაგებობების მშენებლობისას წყალმომარაგების და წყალარინების საკითხების მოგვარებისას დასახელებული პუნქტებისა და საწარმოების თბოაირმომარაგების პრობლემურ საკითხებზე მუშაობისას ინოვაციური კვლევის დამოუკიდებლად დაგეგმვის, განხორციელებისა და ზედამხედველობის უნარი; აქვს ჰიდროინჟინერიაში უახლესი კვლევითი ანალიტიკური და სტატისტიკური მეთოდების გამოყენებისა და რთული ამოცანების ამოხსნის უნარი და სხვა,.” – აღნიშნავს ,,ჰიდრო ემ”-ის წარმომადგენელი.
კომპანიის დირექტორი გაოცებულია იმით, რომ კასპის მერიაში, ჰიდროინჟინერიაში დოქტორის აკადემიური ხარისხის მქონე პირი, არ მიიჩნიეს სათანადო კვალიფიკაციის მქონე თანამშრომლად.
კასპის მერის მოადგილე კი, როგორც მის ბიოგრაფიაში აღნიშნული, თსუ-ს კურსდამთავრებულია, კერძოდ, მას თბილისის სახელმწიფო უნივერსიტეტი 1991-1996 წლებში დაუმთავრებია სამართალმცოდნეობის სპეციალობით.
