დირექტორი: უფლისციხის მუზეუმ-ნაკრძალის გახსნას 15 ივნისისთვის ვვარაუდობთ

49
უფლისციხე

უფლისციხის მუზეუმ-ნაკრძალის დირექტორის ბადრი გასპაროვის ინფორმაციით, მუზეუმი სავარაუდოდ, 15 ივნისიდან განაახლებს მუშაობას. ამის შესახებ რადიო მოზაიკა წერს.

“მუზეუმ-ნაკრძალის გახსნას 15 ივნისიდან ვვარაუდობთ, როგორც ეს ითქვა პრემიერმინისტრის მხრიდან, თუმცა, როგორც ვხედავთ გარკვეული პროცესები დაჩქარებულია ქვეყანაში შექმნილი ეპიდემიოლოგიური მდგომარეობიდან გამომდინარე, ასე, რომ შესაძლებელია უფრო ადრეც შევძლოთ ვიზიტორების მიღება, თუმცა, რა თქმა უნდა, მოგვიწევს გარკვეული რეკომენდაციების დაცვა” , – განმარტა ბადრი გასპაროვმა.

როგორც ცნობილია, უფლისციხის მუზეუმ-ნაკრძალი, სხვა მუზეუმების მსგავსად, 24 მარტიდან დაკეტილია.

ტურიზმის ანტიკრიზისული გეგმის წარდგენისას, 7 მაისს, საქართველოს პრემიერმინისტრმა, გიორგი გახარიამ განაცხადა, რომ 15 ივნისიდან საქართველო ადგილობრივი ტურისტებისთვის, 1 ივლისიდან კი, უცხოელი ტურისტებისთვისაც გაიხსნება.

ახალი კორონავირუსის გავრცელების გამო 21 მარტს საქართველოში საგანგებო მდგომარეობა, ხოლო 31 მარტიდან კარანტინი გამოცხადდა. საგანგებო მდგომარეობა ქვეყანაში 22 მაისამდეა დაწესებული.

კარანტინის ფარგლებში სრულად იკრძალება ნებისმიერი ტიპის საზოგადოებრივი ტრანსპორტით, მათ შორის, მეტროთი, გადაადგილება. 21 საათიდან დილის 6 საათამდე კი ქვეყნის მასშტაბით კომენდანტის საათი მოქმედებს, რის გამოც გადაადგილება ეზღუდება როგორც ქვეითად, ისე ტრანსპორტით მოსიარულეებს. მათთვის კი, ვისი მუშაობაც ამ პერიოდში აუცილებელია, გადაადგილება სპეციალური საშვებით მოხდება. ყველა მოქალაქეს ქუჩაში გადაადგილებისას, დღის ნებისმიერ დროს, თან უნდა ჰქონდეს პირადობის დამადასტურებელი დოკუმენტი.

სასურსათო მაღაზიებსა და აფთიაქების გარდა, საქართველოში 3 პირზე მეტის შეკრება აიკრძალა. ამასთან, დახურულ საჯარო სივრცეში პირბადეების ტარება სავალდებულო გახდა.

COVID-19-ის აფეთქება ჩინეთში 2019 წლის დეკემბერში დაიწყო და დღეისათვის ის მსოფლიოს 212 ქვეყანაშია გავრცელებული.  ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. ამ დროისთვის კორონავირუსი განსაკუთრებით ევროპის კონტინენტზე მძვინვარებს. საქართველოში ამჟამად COVID-19-ით ინფიცირების 652 შემთხვევაა დაფიქსირებული, საიდანაც 383 უკვე გამოჯანმრთელდა, 12 ადამიანი კი გარდაიცვალა.