პრეზიდენტის მოტივირებული შენიშვნების მიზანი არის, რომ საქართველოს პარლამენტს და მოსახლეობას გააგებინოს ის უარყოფითი შედეგები, რომელსაც თვითმმართველობის და საარჩევნო კოდექსებში ცვლილებები მოიტანს, – ამის შესახებ პრეზიდენტის საპარლამენტო მდივანმა, ანა დოლიძემ ჟურნალისტებთან განაცხადა.
მისი თქმით, პრეზიდენტის ყველა ვეტო გამიზნულია კონსტიტუციური წესრიგისა და დემოკრატიული წყობილების დასაცავად.
“აქამდე პრეზიდენტის ყველა ვეტო გამიზნული იყო ჩვენი კონსტიტუციური წესრიგის, დემოკრატიული წყობილების დასაცავად. ყველა იმ შემთხვევაში როდესაც ამას განსაკუთრებული საფრთხე ემუქრება პარლამენტიდან შემოსული კანონებით, პრეზიდენტი მოტივირებული შენიშვნებით უბრუნებდა პარლამენტს ამ კანონებს. ამ შემთხვევაშიც, პრეზიდენტის მოტივირებული შენიშვნების მიზანი არის, რომ საქართველოს პარლამენტს და მოსახლეობას გააგებინოს ის უარყოფითი შედეგები, რომელსაც მოიტანს თვითმმართველობის და საარჩევნო ცვლილებები. ამ შედეგებს ჩვენ დავინახავთ უახლოეს მომავალში. ვეტო არის იმის საშუალება, რომლითაც პრეზიდენტი მიუთითებს საქართველოს პარლამენტს, რომ არ მიიღოს ეს ცვლილებები, რომელიც მას დაგეგმილი აქვს”,- განაცხადა ანა დოლიძემ.
საქართველოს პრეზიდენტმა, გიორგი მარგველაშვილმა ვეტოს უფლებამოსილება პარლამენტის მიერ მიღებულ სამ კანონპროექტთან დაკავშირებით გამოიყენა.
აქედან ერთი “ადგილობრივი თვითმმართველობის კოდექსში” განხორციელებული ცვლილებების პროექტია, ხოლო ორი – “საარჩევნო კოდექსთან” დაკავშირებული სხვადასხვა კანონპროექტი.
წყარო: ინტერპრესნიუსი
