„ქართული ოცნება“ ხალხს არ ენდობა და სწორედ ამიტომ ართმევს რამდენიმე ქალაქს თვითმმართველი ქალაქის სტატუსს, – ამის შესახებ საპარლამენტო უმცირესობის წევრმა, გიორგი კანდელაკმა ადგილობრივი თვითმმართველობის კოდექსში განხორციელებულ ცვლილებებთან დაკავშირებით განაცხადა, რომელსაც პრეზიდენტმა ხელი არ მოაწერა და ვეტო დაადო.
”ერთ-ერთი ზიანი, რაც ”ქართული ოცნების” ხელისუფლებამ ქვეყანას მოუტანა, არის ადგილობრივ თვითმმართველობებში სიტუაციის უკიდურესად დამძიმება – ბიუროკრატიის გაბერვა, ნეპოტიზმი, მეგობრებისა და ნათესავების დასაქმება, თვითმმართველობები წერა-კითხვის უცოდინარი ხალხით არის სავსე და ბევრი ტყუილად იღებს ხელფასს. ამასთან ერთად, ”ქართული ოცნება” რამდენიმე ქალაქს თვითმმართველი ქალაქის სტატუსს ართმევს და ამას იმიტომ აკეთებს, რომ საკუთარ თანამოქალაქეებს არ ენდობა. ზოგადად, ყველაფერი პრეზიდენტსა და საპარლამენტო უმრავლესობას შორის ინსტიტუციურ კინკლაობაშია გადაზრდილი და ამან არაჯანსაღი სახე მიიღო”, – განუცხადა ჟურნალისტებს გიორგი კანდელაკმა.
ამასთან, კანდელაკი თავს იკავებს პრეზიდენტის იმ ვეტოს შეფასებისგან, რომელიც გიორგი მარგველაშვილმა საარჩევნო კოდექსში განხორციელებულ ცვლილებებთან დაკავშირებით გამოიყენა. ცნობისთვის, აღნიშნულ პროექტში ერთ-ერთი ინიციატივა, რომლითაც მერობის კანდიდატებს საკრებულოს არჩევნებში კენჭისყრის შესაძლებლობაც ექნებათ, სწორედ საპარლამენტო უმცირესობის წინადადების გათვალისწინებით აისახა.
წყარო: ინტერპრესნიუსი
