კასპის მერის მოადგილე თანამდებობიდან გადადგა

272

2020 წლის 3 იანვრიდან კასპის მერის მოადგილის პოსტი ვაკანტურია. ამის შესახებ ინფორმაციას შიდა ქართლის საინფორმაციო ცენტრი ავრცელებს.

ადმინისტრაციის ხელმძღვანელის, ნინო ჯინიყაშვილის განცხადებით, რომელიმე კანდიდატის დანიშვნის შესახებ, კასპის მერს ბრძანება გამოცემული არა აქვს.

ზაზა მარიდაშვილის გათავისუფლების შესახებ არსებული სიტუაციის გამო, კასპის ,,ქართული ოცნების” მხარდამჭერთა რიგებში შეშფოთებას გამოთქვამენ. შტაბის ყოფილი ხელმძღვანელი რამაზ ბერიანიძე ამბობს, რომ შიდა ქართლის სახელმწიფო რწმუნებულის, გიორგი ხოჯევანიშვილის ჩარევით, კასპის თვითმმართველობის ორგანოებში გორელ და თბილისელ კადრებს ნიშნავენ.

,,როგორ ბედავთ და კასპში მთელ რიგ თანამდებობებზე გარედან გვიგზავნით გაუგებარი ცოდნისა და გამოცდილების მლიქვნელებს? რატომ ხარჯავთ კასპელთა ბიუჯეტს ასე თქვენს ნებაზე, რომ ვიღაც ვიგინდარები თბილისიდან და გორიდან დაბრძანდებიან კასპში? შუადღის შემდეგ კი ვერც ერთს იპოვი ადგილზე მერის გარდა, ეგაა ერთი ადგილობრივი, დამლაგებლის დანიშვნაც რომ თქვენთან შასათანხმებელია, ესაა თქვენი თვითმართველობაა? არც გაბედოთ ვინმე გარედან მოათრიოთ, თორემ გაძლევთ პირობას, ჯერ მე გნახავთ პირადად და გაგეცნობით, ვინც ვარ, მერე კი სააკაძის მოედანზე დაგიმწკრიებთ ამ ტურისტ თანამდებობის პირებს და ეგრე გამოგიპანღურებთ ყველას,” – მიმართავს რამაზ ბერიანიძე შიდა ქართლის სახელმწიფო რწმუნებულს.

ბერიანიძე 1990-იან წლებში პარლამენტის წევრი იყო, ასევე, კასპის რაიონის გამგეობაში წამყვან თანამდებობას იკავებდა.

qartli.ge წერს, რომ კასპის მერი სატელეფონო ზარებს არ პასუხობს. მას ამ ეტაპზე მხოლოდ ერთი, პირველი მოადგილე ჰყავს. საკრებულოს მიერ დადგენილი რეგლამენტის მიხედვით, მას შეუძლია, მხოლოდ, ორი მოადგილე ჰყავდეს.