ქუთაისში ნიკეას ქუჩაზე 46,5 მეტრი სიმაღლის დროშის დგარის მოსაწყობად გამოცხადებულ ტენდერში წინადადებების მიღება დასრულდა და 36 299 ლარზე გამოცხადებული ელექტრონული ტენდერით მხოლოდ ერთი პრედენდენტი შპს “ლიზი“ დაინტერესდა. კომპანია, გამარჯვების შემთხვევაში სამუშაოებს 35 191 ლარად შეასრულებს.
ქუთაისს დროშა ინდურმა კომპანია “სითი ქონსთრაქშენმა“ აჩუქა და როგორც მერიაში განმარტავენ ის ყველაზე მაღალი დროშა იქნება საქართველოში. მათივე ინფორმაციით, დროშის სადგარი უკვე ქუთაისშია ჩატანილი.
შეგახსენებთ, რომ ქუთაისის მერიამ, ნიკეას ქუჩაზე ეროვნული დროშის აღსამართად საჭირო დგარის მოსაწყობად პირველი ტენდერი 2018 წლის 16 აპრილს გამოაცხადა. 25 აპრილს კი სატენდერო კომისიამ გამართულ სხდომაზე დროშის დგარის მოსაწყობად გამოცხადებული ელექტრონული შესყიდვა მიზანშეწონილად არ მიიჩნია და მისი შეწყვეტის გადაწყვეტილება მიიღო.
მანამდე კი, მერიამ დგარის პროექტის შედგენისთვისაც 4 500 ლარიანი ტენდერი გამოაცხადა, რომელიც არ შედგა.
ქალაქის ერთ-ერთ მთავარ შემოსასვლელთან ეროვნული დროშის აღმართვისთვის 65 000 ლარის დახარჯვა ადგილობრივმა ოპოზიციამაც გააპროტესტა.
