“სოფლის მხარდაჭერის პროგრამის“ ფარგლებში სიღნაღის მუნიციპალიტეტის რამდენიმე სოფელში საერთო კრებები უკვე ჩატარდა და ადგილობრივმა მოსახლეობამ განსახორციელებელი პროექტიც შეარჩია.
სიღნაღის სოფელ გურჯაანში, ვეჯინში, ჭანდარში, კოლაგში, ბაკურციხეში, კარდენახში და მელაანში “სოფლის მხარდაჭერის პროგრამიდან” თითოეული სოფლისთვის გამოყოფილი 10 000 ლარით ადგილობრივებმა მსჯელობის შემდეგ გარეგანათების მოწყობა გადაწყვიტეს.
სოფელ ჩალაუბანში ადგილობრივი მოსახლეობისთვის პრიორიტეტული სარწყავი წყლის რეზერვუარის დამატება აღმოჩნდა და სწორედ მას მოხმარდება პროგრამიდან გამოყოფილი 8 000 ლარი. ხოლო, სოფელ ვაქირში მოსახლეობამ ხმათა უმრავლესობით სასაფლაოს კეთილმოწყობა გადაწყვიტა.
მერიის ინფორმაციით, დღეს საერთო კრებები ქალაქი წნორში, სოფელი ბოდბისხევიში და სოფელი ჯუგაანში გაიმართა.
შეგახსენებთ, რომ სოფლის მხარდაჭერის პროგრამის განხორციელება საქართველოს მთავრობამ 2009 წელს დაიწყო და 2017 წელს სრულიად მოულოდნელად და ყოველგვარი განმარტების გარეშე გააუქმა. პროგრამის გაუქმებას ადგილობრივი ხელისუფლების წარმომადგენლები და “ქართული ოცნების” მაჟორიტარი დეპუტატები ეწინააღმდეგებოდნენ, თუმცა, ის ვერც 2017 და ვერც 2018 წლის სახელმწიფო ბიუჯეტში ვეღარ მოხვდა. თავდაპირველად ხელისუფლება არ ასახელებდა მიზეზს, თუ ამგვარი გადაწყვეტილება რის გამო მიიღო, თუმცა, მოგვიანებით ითქვა, რომ პროგრამა არაეფექტური იყო და ბიუჯეტს 50 მილიონი ლარი დაუზოგეს.
მთავრობამ სოფლის მხარდაჭერის პროგრამა ორწლიანი პაუზის შემდეგ აღადგინა. თუმცა, პროგრამაზე, 50 მილიონი ლარის ნაცვლად, მხოლოდ 20 მილიონი ლარი დაიხარჯება და ის რეგფონდის 280 მილიონიდან დაიფარება.
მაია ცქიტიშვილის თქმით, მთავრობის გადაწყვეტილებით, სოფლის მხარდაჭერის პროგრამის ფარგლებში, გამოყოფილი 20 მილიონი ლარი, სოფლის მოსახლეობის უშუალო ჩართულობითა და მათივე გადაწყვეტილებით, მცირე ინფრასტრუქტურული პროექტების განხორციელებას მოხმარდება.
სოფლის მხარდაჭერის პროგრამა სულ 3 700 სოფელს მოიცავს, საერთო კრებებში კი პირველ მარტამდე ნახევარ მილიონზე მეტი ადამიანი მიიღებს მონაწილეობას. მცირე ინფრასტრუქტურულ პროექტებზე 5 ათასიდან 10 ათას ლარამდე თანხა დასახლების ზომის მიხედვით განაწილდება.
