გარდაბნის მუნიციპალიტეტის სოფელ მთისძირს ორი კვირაა წყალი არ მიეწოდება, რის გამოც ადგილობრივები საპროტესტო აქციებს იწყებენ. დღეს 40-მდე ადამიანმა რუსთავის ციხეებისკენ მიმავალი საავტომობილო გზა გადაკეტა და წყლის აღდგენა მოითხოვა. ინფორმაციას “ნეტგაზეთი” ავრცელებს.
მთისძირის მკვიდრი, დალი წიკლაური ამბობს, რომ სოფლის მოსახლეობა მრიცხველით პატიოსნად იხდიდა წყლის გადასახადს, მაგრამ ეუბნებიან, რომ მთელ სოფელს აქვს ვალი, რის გამოც გადაუკეტეს წყალი.
“პატარა სოფელია. დიდი და პატარა სუყველა აქა ვართ. იწერება დიდი ვალები ჩვენს სოფელზე. ჩვენ მოსახლეობის მრიცხველიდან ვიხდიდით წყლის გადასახადს, მაგრამ ვალი ამოვიდა 50 ათასამდე. გვეუბნებიან, 48 ათასი ლარი გადაიხადეთ და გამოვუშვებთ წყალსო. გასარკვევია ბევრი რაღაც იმიტომ, რომ მრიცხველით პატიოსნად ვიხდიდით გადასახადს და საიდან მოვიდა ეს ვალი, არ ვიცით,” – თქვა დალი წიკლაურმა.
სოფელ მთისძირში მობილიზებულია საპატრულო პოლიცია. ასევე, ადგილზე იმყოფებიან გარდაბნის მულიციპალიტეტის მერიის თანამშრომლებიც. როგორც დალი წიკლაურმა თქვა, ისინი დახმარებას დაპირდნენ ადგილობრივებს პრობლემის მოგვარებაში: “გვითხრეს, სამშაბათს დაელოდეთო და ვნახოთ. თუ არ აღდგება წყალი, კიდევ გავმართავთ აქციებს.”
