ჯანდაცვის სამინისტროს სოციალური მომსახურების სააგენტომ დაადგინა, რომ შიდა ქართლის ერთ-ერთი კლინიკის ამბულატორიებში 80 000-ზე მეტი ბენეფიციარისთვის გაწეული უფასო მომსახურების ფაქტი არ დასტურდება. ამის გამო, სააგენტო ერთ-ერთ კლინიკას 4,6 მლნ ლარს სთხოვს, საიდანაც 1,6 მლნ ლარი წარმოადგენს სახელმწიფო ბიუჯეტიდან ანაზღაურებულ თანხას, ხოლო 3 მლნ ლარი – ფინანსურ ჯარიმას. კლინიკამ გადაწყვეტილება გაასაჩივრა. ინფორმაციას შიდა ქართლის საინფორმაციო ცენტრი ავრცელებს.
ბოლო სასამართლო პროცესი 2021 წლის 21 სექტემბერს გაიმართა. სასამართლომ მიიჩნია, რომ ჯანდაცვის სამინისტროს მომსახურების სააგენტოს მიერ შედგენილი დასკვნა დაგვიანებულია, რადგან დარღვევები გამოვლენილია 2013-2017 წლებში მიმდინარე პროგრამაზე, რასაც ჯანდაცვის საყოველთაო პროგრამა ერქვა. სასამართლოს მიაჩნია, რომ შესაბამისი რეაგირება ჯანდაცვის სამინისტროს უნდა მოეხდინა არა უმეტეს 3 წლის ვადაში.
რა დაადგინა მომსახურების სააგენტომ?
საყოველთაო ჯანმრთელობის დაცვის სახელმწიფო პროგრამის მიხედვით, ქალაქში (ან დაბაში) მაცხოვრებელი პირი მიეთითება ძირითად კონტიგენტში, ხოლო სოფლად მაცხოვრებელი – დამატებით კონტიგენტში.
მომსახურების სააგენტომ დაადგინა, რომ სოფლად მცხოვრები ადამიანები დარეგისტირებულნი იყვნენ ძირითად კონტინგენტში, ნაცვლად დამატებით კონტინგენტისა. რადგანაც ძირითად კონტიგენტში რეგისტრირებულ პირებზე სახელმწიფო დაფინანსება 0.86 ლარით მეტი იყო, კლინიკამ სოფლის მოსახლეობის ხარჯზე დამატებითი შემოსავლები უკანონოდ მიიღო.
კლინიკამ ბრალდებას იმით უპასუხა, რომ ბენეფიციარები, ძირითად და დამატებით კონტიგენტში, ელექტრონული პორტალის მონაცემების მიხედვით რეგისტრირდებოდნენ.
სოციალური მომსახურების სააგენტომ, 2013 – 2017 წწ-ში გეგმიური ამბულატორიული მომსახურების მისაღებად რეგისტრირებულ მოსარგებლეებზე შევსებული თანხმობის ფორმები, სხვა დოკუმენტებთან ერთად, შეამოწმა.
სააგენტოს ცნობით, სამედიცინო ცენტრში გამოვლინდა შემდეგი დარღვევები:
ა) მიმწოდებელმა 80 186 შემთხვევაში ვერ წარადგინა გეგმიური ამბულატორიული მომსახურების კომპონენტით მოსარგებლეთა რეგისტრაციისათვის საჭირო თანხმობის ფორმები;
ბ) გეგმიური ამბულატორიული მომსახურების კომპონენტით გათვალისწინებული მომსახურების მიმღებად ძირითად კონტიგენტში დარეგისტრირებული არიან სოფლად მცხოვრები პაციენტები, რომლებიც რეგისტრირებულნი უნდა ყოფილიყვნენ დამატებით კონტიგენტში, რის გამოც შპს „…ს“ თითოეულ შემთხვევაზე სახელმწიფო ბიუჯეტიდან ზედმეტად მიღებული აქვს 0.86 ლარით მეტი, სულ – 36 590.42 ლარი.
სასამართლო მიუთითებს, რომ ხანდაზმულობის ვადის ზრდა 3-დან 5 წლამდე, პირდაპირ გავლენას ახდენს მხარის იურიდიული პასუხისმგებლობის საკითხზე.
,,აღნიშნული კი იძლევა შესაძლებლობას, შემოწმება შეეხოს შემოწმების დაწყებამდე 3 წლის წინანდელ შესაძლო დარღვევებსაც, რამაც, თავის მხრივ, შესაძლოა გამოიწვიოს კლინიკის პასუხისმგებლობასაც.’’ – წერია გადაწყვეტილებაში.
სასამართლოს აზრით, სოციალური მომსახურების სააგენტოს მიერ გამოვლენილი დარღვევების ძირითადი ნაწილი უკავშირდება ტექნიკურ ხარვეზებს, თუმცა მნიშვნელობის საკითხები სრულყოფილად არაა გამოუკვლეველი.
,,მაგალითად, არ დგინდება, კლინიკა ბრალეულია თუ არა თანხმობის ფორმების შეუვსებლობაზე სადაზღვევო კომპანიის იმ ბენეფიციარებზე, რომელთა ბაზაც სსიპ სოციალური მომსახურების სააგენტომ თავად გადასცა მოსარჩელეს;
ვერ დგინდება, ზუსტად რომელ დღეს მოხდა სადაზღვევო კომპანიის ბენეფიციართა ბაზის კლინიკისთვის გადაცემა და რეგისტრაცია;
არ გამოკვლეულა ბენეფიციარებს, რომლებზეც არ არსებობს თანხმობის ფორმები, გაეწიათ თუ არა რაიმე სამედიცინო მომსახურება და თუკი გაეწიათ, ამ ფორმით ნების გამოხატვა საკმარისია თუ არა მათი ამ სამედიცინო დაწესებულების ბენეფიციარებად მიჩნევისათვის.
სასამართლო აღნიშნავს იმასაც, რომ სამედიცინო დაწესებულებაში აღრიცხულია არაერთი ბენეფიციარი, რომლებიც არ არიან დაზუსტებით იდენტიფიცირებულნი.
,,ადმინისტრაციულ ორგანოს გააჩნია ვალდებულება, სრულყოფილად და ჯეროვნად გამოიკვლიოს საქმისათვის არსებითი მნიშვნელობის მქონე ყველა გარემოება, დეტალურად და ამომწურავად დაასაბუთოს გამოვლენილი თითოეული ხარვეზი, დარღევის თითოეული შემთხვევა და მათ მიერ გამოწვეული ზიანის არსებობა, მისი მოცულობა, რამაც შეიძლება განაპირობოს შესაბამისი სამედიცინო დაწესებულების სანქცირება. არგუმენტაციისა და გამოკვლევის გარეშე გარემოებების ზოგადი ასახვა არ უნდა გახდეს სამედიცინო დაწესებულებისათვის თანხის დაკისრების საფუძველი. ‘’ – წერია 2021 წლის 21 სექტემბრის გადაწყვეტილებაში.
