ფოთში კუნძულის სანაპირო ზოლის სარეაბილიტაციო სამუშაოები მიმდინარეობს

177

ქალაქ ფოთში კუნძულის სანაპირო ზოლის რეაბილიტაციის მესამე ეტაპის სამუშაოები დაიწყო. ამის შესახებ ინფორმაციას ფოთის მუნიციპალიტეტის მერია ავრცელებს.

მათი ცნობით, პროექტი ითვალისწინებს საფეხმავლო და ველობილიკების მოწყობას, საინჟინრო (ჰიდროტექნიკური) ნაგებობის აღდგენა-რეაბილიტაციას, ტერიტორიის გამწვანება-კეთილმოწყობას, მისასვლელი გზებისა და სანიაღვრე არხების მოწყობას, ღობეების რეაბილიტაციას.

კუნძულის სანაპირო ზოლზე მოეწყობა დაღუპულ მეზღვაურთა მონუმენტი.

როგორც ფოთის მერიაში განმარტავენ, სამუშაოების ღირებულება 2 560 000 ლარს შეადგენს.

კუნძულის სანაპიროს 2 000 – მეტრიან ზოლზე მოეწყო შიდა კომუნიკაციები, დამონტაჟდა განათების სისტემა, დაიგო საფეხმავლო და საავტომობილო გზები, აშენდა სავარჯიშო ზონები-ჩოგბურთის კორტი, მინისაფეხბურთო მოედანი, მოეწყო ვეტერანთა სახლი.

ფოთის მერიაში აცხადებენ, რომ პროექტის განხორციელება მნიშვნელოვანია ტურისტული ინფრასტრუქტურის განვითარების მიმართულებით. ინფრასტრუქტურული განახლება და მოწესრიგებული სივრცეები ქალაქს მეტ სიცოცხლეს სძენს.