მოსახლეობის მოთხოვნით, სოფელ ქვემო ბოლნისში რიტუალების სახლი შენდება, – ამის შესახებ ინფორმაციას ბოლნისის მუნიციპალიტეტის მერია ავრცელებს.
პროექტი სრულად ადგილობრივი ბიუჯეტიდან ფინანსდება და მისი ღირებულება 398 526 ლარს შეადგენს.
ინფრასტრუქტურული პროექტის მიმდინარეობის პროცესს ბოლნისის მუნიციპალიტეტის მერი დავით შერაზადიშვილი, სივრცითი მოწყობისა და ინფრასტრუქტურის სამსახურის უფროსთან კონსტანტინე კორძაძესთან ერთად გაეცნო.
ამასთან, წელს ქვემო ბოლნისში, რიტუალების სახლის მშენებლობის გარდა, 1 500 გრძივ მეტრზე ბეტონის გზის დაგებაც ხორციელდება.
„სულ მალე ქვემო ბოლნისში მცხოვრები ჩვენი მოქალაქეები ახალი რიტუალების სახლით სარგებლობას შეძლებენ. ახალი რიტუალების სახლის აშენება მოსახლეობის დიდი სურვილი იყო და მოხარული ვარ, რომ ეს პროექტი უკვე დასკვნით ფაზაში შედის. ამ სამუშაოებისთვის ადგილობრივმა თვითმმართველობამ ბიუჯეტიდან 398 526 ლარი გამოყო. აღსანიშნავია, რომ წელს სოფელში ბეტონის გზის მოწყობის მეორე ეტაპიც ხორციელდება”, – განაცხადა ბოლნისის მუნიციპალიტეტის მერმა დავით შერაზადიშვილმა.
