ლაგოდეხის მუნიციპალიტეტში სტიქიური ნაგავსაყრელების ლიკვიდაციის სამუშაოები დაიწყო. როგორც მუნიციპალიტეტის მერი ჯონდო მდივნიშვილი აცხადებს, ნაგავსაყრელები ეტაპობრივად მოწესრიგდება.
„მუნიციპალიტეტში არსებული ყველა სტიქიური ნაგავსაყრელი ეტაპობრივად მოწესრიგდება. მუნიციპალიტეტში ნარჩენების მართვის ახალი სისტემის დანერგვა, განვითარებული ქვეყნების გამოცდილებითა და მათ მიერ დანერგილი მეთოდებით, არცთუ ისე რთულია, მაგრამ რთულია იმის მოფიქრება, როგორ მივიღოთ მაქსიმალური შედეგი, მინიმალური რესურსით. თუმცა, გამოსავალი, რა თქმა უნდა, აქაც არსებობს. სტიქიური ნაგავსაყრელები, როგორც მთლიანად საქართველოში, ლაგოდეხშიც არსებობს. მათი ლიკვიდაციისა და აღმოფხვრის გეგმა უკვე დასახულია.
არსებობს დასასუფთავებელი ნაგავსაყრელების ბაზა, თუმცა, მაინც შეიქმნა ცხელი ხაზი, რომელზეც ყველა მოქალაქეს შეუძლია, დარეკოს და ინფორმაცია მიაწოდოს შესაბამის სამსახურს. დასუფთავების სამუშაოები, ა(ა)იპ ლაგოდეხის სერვის ცენტრმა უკვე დაიწყო. ახალი ნაგავსაყრელის წარმოქმნის თავიდან აცილების მიზნით, ვგეგმავთ ნაგვის ბუნკერების დამატებასა და ნარჩენების სისტემატურად გატანას“, – განაცხადა ჯონდო მდივნიშვილმა.
