ფოთში, ჯავახიშვილის ქუჩის მცხოვრებლებმა საპროტესტო აქცია გამართეს. შეკრებილებმა ნავსადგურის მიმდებარე ტერიტორია გადაკეტეს. მათი განცხადებით, პორტის ტერიტორიაზე ჯანმრთელობისთვის საშიში ნივთიერებები ღია წესით მუშავდება.
მათივე თქმით, აღნიშნული ნივთიერების ტრანსპორტირება უსაფრთხოების ნორმების დარღვევით ხორციელდება.
„აქ ვცხოვრობთ როგორც აფხაზეთიდან დევნილი ოჯახები, ასევე ადგილობრივები. მოვიწამლეთ, გარეთ ვერ გამოვდივართ. გოგირდს ვჭამთ. ბავშვები ვერ გაგვყავს სასეირნოდ. ყოველ მეორე დღეს ხალხი საოპერაციოდ მიყავთ, ფილტვები არ გვივარგა, ბრონქები არ გვივარგა და საშინელ დღეში ვართ. მოგვაცილონ ის შავი ნივთიერება, რომელსაც ამუშავებენ. აღნიშნული ნივთიერების ტრანსპორტირებაც უსაფრთხოების ნორმების დარღვევით ხორციელდება. ქარის დროს საშინელი მტვერია და ვიხრჩობით. ძალიან კარგად ვცხოვრობდით აქ აქამდე და ვიცხოვრებთ კიდეც. ვიდრე ჩვენი მოთხოვნა არ შესრულდება, არ მივცემთ მუშაობის საშუალებას,“ – განაცხადა აქციის ერთ-ერთმა მონაწილემ.
აქციის მონაწილეები პასუხისმგებლობას ხელისუფლებას აკისრებენ და პრობლემის დროულად მოგვარებას მოითხოვენ. მერიაში აღნიშნულ საკითხზე კომენტარი ჯერ არ გაუკეთებიათ.
