აჭარაში საჯარო სკოლების მშენებლობა-რეაბილიტაციის სამუშაოები განახლდა

50

აჭარაში საჯარო სკოლების მშენებლობა-რეაბილიტაციის სამუშაოები განახლდა. ინფორმაციას აჭარის მაუწყებელი ავრცელებს.

აჭარის განათლების სამინისტროს ინფორმაციით, პროცესი კოვიდ-19-ის  პრევენციასთან დაკავშირებული მოთხოვნების დაცვით მიმდინარეობს.

ამ დროისათვის რეგიონში 8 საჯარო სკოლა შენდება და 2 სკოლის სასპორტო დარბაზი. დამატებითი კორპუსი შენდება  ბათუმის -მე-6 ფიზიკა-მათემატიკის სკოლასთან.

შეგახსენებთ, საქართველოს ხელისუფლების გადაწყვეტილებით,  სამშენებლო-სარემონტო სამუშაოებზე, სამშენებლო მასალების წარმოებასა და სამშენებლო ზედამხედველობასთან დაკავშირებულ საქმიანობაზე დაწესებული ყველა შეზღუდვა, 5 მაისს მოიხსნა.

ახალი კორონავირუსის გავრცელების გამო 21 მარტს საქართველოში საგანგებო მდგომარეობა, ხოლო 31 მარტიდან კარანტინი გამოცხადდა. საგანგებო მდგომარეობა ქვეყანაში 22 მაისამდეა დაწესებული.

კარანტინის ფარგლებში სრულად იკრძალება ნებისმიერი ტიპის საზოგადოებრივი ტრანსპორტით, მათ შორის, მეტროთი, გადაადგილება. 21 საათიდან დილის 6 საათამდე კი ქვეყნის მასშტაბით კომენდანტის საათი მოქმედებს, რის გამოც გადაადგილება ეზღუდება როგორც ქვეითად, ისე ტრანსპორტით მოსიარულეებს. მათთვის კი, ვისი მუშაობაც ამ პერიოდში აუცილებელია, გადაადგილება სპეციალური საშვებით მოხდება. ყველა მოქალაქეს ქუჩაში გადაადგილებისას, დღის ნებისმიერ დროს, თან უნდა ჰქონდეს პირადობის დამადასტურებელი დოკუმენტი.

სასურსათო მაღაზიებსა და აფთიაქების გარდა, საქართველოში 3 პირზე მეტის შეკრება აიკრძალა. ამასთან, დახურულ საჯარო სივრცეში პირბადეების ტარება სავალდებულო გახდა.

COVID-19-ის აფეთქება ჩინეთში 2019 წლის დეკემბერში დაიწყო და დღეისათვის ის მსოფლიოს 212 ქვეყანაშია გავრცელებული.  ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. ამ დროისთვის კორონავირუსი განსაკუთრებით ევროპის კონტინენტზე მძვინვარებს. საქართველოში ამჟამად COVID-19-ით ინფიცირების 671 შემთხვევაა დაფიქსირებული, საიდანაც 393 უკვე გამოჯანმრთელდა, 12 ადამიანი კი გარდაიცვალა.