გორის სოციალურ მაცივარში მოსახლეობამ პროდუქტების დატოვება დაიწყო. მოქალაქეები მიდიან და სტალინის #13-ში მდებარე მაცივარში სურსათს იმ ადამიანებისთვის ტოვებენ, რომლებსაც საკვები სჭირდებათ. ამის შესახებ რადიო მოზაიკა წერს.
ქალაქში სოციალური მაცივარი 5 წლის წინ, გორის ახალგაზრდული მოძრაობა “დროას” ინიციატივით დაიდგა. თავდაპირველად, მოსახლეობა მაცივარში პროდუქტებს აქტიურად ტოვებდა, თუმცა გარკვეული პერიოდის შემდეგ, მაცივარში საკვები პროდუქტების რაოდენობა შემცირდა.
კორონავირუსის გავრცელების საფრთხის მატებასთან ერთად, გორის მოსახლეობამ კვლავ დაიწყო სოციალური მაცივრის პროდუქტებით შევსება.
შეგახსნებეთ, რომ სოციალურ მაცივარში შესაძლებელია დატოვოთ გამოსაყენებლად ვარგისი საკვები პროდუქტები, რომელსაც შემდგომ ის ადამიანები გამოიყენებენ, რომელთაც საკვები არ აქვთ.
ცნობისთვის, მაცივარზე, რომელიც გორის ცენტრში დგას, განმარტებულია, რომ მაცივარში მოთავსებული საკვებზე უნდა იყოს დატანებული ვარგისიანობის ვადა.
საქართველოს მთავრობის გადაწყვტილებით, 17 აპრილის დღის 12 საათიდან, 21 აპრილის ჩათვლით, საქართველოში სრულად იკრძალება მსუბუქი ავტომობილებით გადაადგილება. ამასთან, დახურულ საჯარო სივრცეში პირბადეების ტარება სავალდებულო ხდება.
აგრეთვე, საგანგებო მდგომარეობის ფარგლებში, 17 აპრილიდან 10 დღის ვადით საქართველოს ქალაქებში სასაფლაოზე გასვლაზე შეზღუდვები წესდება.
საქართველოში საგანგებო მდგომარეობა 21 აპრილის ჩათვლითაა გამოცხადებული, თუმცა, ის, მთავრობის ინიციატივით, 10 მაისამდე გახანგრძლივდება. ამასთან, თბილისში, რუსთავში, ბათუმსა და ქუთაისში შესვლა და გასვლა 15 აპრილის 21:00 საათიდან 10 დღით აიკრძალა.
ახალი კორონავირუსის გავრცელების გამო, 21 მარტს საქართველოში საგანგებო მდგომარეობა, ხოლო 31 მარტიდან კი საქართველოს მთელს ტერიტორიაზე კარანტინი გამოცხადდა.
კარანტინის ფარგლებში სრულად იკრძალება ნებისმიერი ტიპის საზოგადოებრივი ტრანსპორტით, მათ შორის, მეტროთი, გადაადგილება. 21 საათიდან დილის 6 საათამდე კი ქვეყნის მასშტაბით კომენდანტის საათი მოქმედებს, რის გამოც გადაადგილება ეზღუდება როგორც ქვეითად, ისე ტრანსპორტით მოსიარულეებს. მათთვის კი, ვისი მუშაობაც ამ პერიოდში აუცილებელია, გადაადგილება სპეციალური საშვებით მოხდება. ყველა მოქალაქეს ქუჩაში გადაადგილებისას, დღის ნებისმიერ დროს, თან უნდა ჰქონდეს პირადობის დამადასტურებელი დოკუმენტი.
გარდა ამისა, სასურსათო მაღაზიებსა და აფთიაქების გარდა, საქართველოში 3 პირზე მეტის შეკრება აიკრძალა.
COVID-19-ის აფეთქება ჩინეთში 2019 წლის დეკემბერში დაიწყო და დღეისათვის ის მსოფლიოს 210 ქვეყანაშია გავრცელებული. ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. ამ დროისთვის კორონავირუსი განსაკუთრებით ევროპის კონტინენტზე მძვინვარებს. საქართველოში ამჟამად COVID-19-ით ინფიცირების 370 შემთხვევაა დაფიქსირებული, საიდანაც 79 უკვე გამოჯანმრთელდა. გარდაცვლილია – 3.
