„ეროვნულ დემოკრატიული ინსტიტუტის“ (NDI) კვლევის თანახმად, გამოკითხულთა უმრავლესობა პოლიტიკური ლიდერებიდან ყველაზე მეტად თბილისის მერის კახა კალაძის საქმიანობით არის კმაყოფილი.
გამოკითხულთა 31% დედაქალაქის მერის კახა კალაძის საქმიანობას დადებითად აფასებს, 13% – ძალიან კარგად, 32% – საშუალოდ, 16% – ცუდად, 6% – ძალიან ცუდად აფასებს, 1%-მა კი კითხვას არ უპასუხა.
როგორც კვლევაშია აღნიშნული, კალაძის შესახებ კითხვები მოქალაქეებს მხოლოდ თბილისში დაუსვეს.
კალაძეს რეიტინგში მოსდევს პრემიერმინისტრი გიორგი გახარია. მის საქმიანობას ძალიან კარგად აფასებს 4%, კარგად – 17%, საშუალოდ – 34%, ცუდად – 24%, ძალიან ცუდად – 10% აფასებს, ხოლო 10%-მა შეკითხვას არ უპასუხა.
ლიდერებს შორის მესამე ადგილზეა პარლამენტის თავმჯდომარე არჩილ თალაკვაძე, რომლის საქმიანობას ძალიან კარგად აფასებს მხოლოდ 1%, კარგად – 12%.
ხელისუფლების წარმომადგენელ ლიდერთა შორის კი რეიტინგის ბოლო ადგილზეა პრეზიდენტი სალომე ზურაბიშვილი. მის საქმიანობას 1% აფასებს ძალიან კარგად, კარგად – 8%, საშუალოდ – 31%, ცუდად – 34%, ძალიან ცუდად – 20%, 6%-მა კი შეკითხვას არ უპასუხა.
კვლევის საველე სამუშაოები ჩატარდა 2019 წლის 19 ნოემბერი-13 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით), 2,180 პირისპირ ინტერვიუს წარმომადგენლობითი შერჩევის საფუძველზე. გამოკითხვის საშუალო ცდომილების ზღვარი +/- 1.9 პროცენტია.
