პროექტები ადგილობრივების ეკონომიკური მდგომარეობის გაუმჯობესებისთვის ხორციელდება, – ამის შესახებ ვიცეპრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა კახეთის საერთაშორისო რეგიონულ საინვესტიციო ფორუმზე სიტყვით გამოსვლისას განაცხადა.
“კახეთის მაგალითზე მინდა გამოვყო თელავში აღდგენილი ბატონის სასახლე და მიმდებარედ მოწყობილი ინფრასტრუქტურა. ასევე, ამჟამად მიმდინარე უჯარმის ციხე-ქალაქის რეაბილიტაციის პროექტი, რომელზეც ძეგლთა დაცვის სააგენტო მუშაობს და ჩვენი სამინისტრო ჩართულია ტურისტული ინფრასტრუქტურის მოწყობის კუთხით. მსგავსი მაგალითებია ბოდბეში, სადაც იგეგმება სათანადო ინფრასტრუქტურის მოწყობა, გომბორზე დავიწყეთ სამუშაოებისთვის მზადება, თუმცა განსაკუთრებით მნიშვნელოვანია ჩვენი ისტორიული ქალაქების ცენტრების რეაბილიტაცია.
უკვე დაიწყო თელავის ცენტრის რეაბილიტაციის პროექტი, ძალიან დიდი პერსპექტივა აქვს ველისციხის საინტერესო ისტორიულ დასახლებას და ამ მიმართულებითაც უკვე ვმუშაობთ. მიმდინარეობს კაკაბეთისა და ველისციხის დამაკავშირებელი გზის პროექტირება და სავარაუდოდ, ეს გზა გაივლის სოფელ ჭერემზე, რომელსაც, ასევე, აქვს განვითარების პერსპექტივა და ვფიქრობთ, იქ შესაბამისი ინფრასტრუქტურის შექმნასა და ისტორიული მემკვიდრეობის აღდგენას,“ – აღნიშნა მაია ცქიტიშვილმა.
მინისტრის თქმით, ყველა პროექტი სახელმწიფოს მხრიდან ინვესტორებისთვის ხელსაყრელი პირობების შექმნისა და ადგილობრივებისთვის ეკონომიკური მდგომარეობის გაუმჯობესებისთვის ხორციელდება.
“ტურისტული ინფრასტრუქტურის განვითარების მიმართულებით, უკვე დამუშავებული გვაქვს სხვადასხვა დასახლების სივრცითი მოწყობის გენერალური გეგმები. დასრულებულია თელავის გენგეგმაზე მუშაობა, დაიწყო საჯარო განხილვები და დამტკიცების პროცედურები. ასეევე, მომზადდა ახმეტის მუნიციპალიტეტისა და თუშეთის 12 სოფლის სივრცითი ტერიტორიული გეგმების დოკუმენტაცია. მთავრობის მიერ უკვე დამტკიცებულია იყალთოს ხევის განაშენიანების გეგმა და ეს ტერიტორია საინტერესოა იმით, რომ ახალი სივრცეა ახალი ინვესტიციებისთვის,“ – განაცხადა მაია ცქიტიშვილმა.
მისივე თქმით, რეგიონული განვითარებისა და ინფრასტრუქტურის სამინისტრო, კოლეგა უწყებებთან და ექსპერტებთან ერთად, კომპლექსური და ინტეგრირებული მიდგომით ცდილობს თანხების ისეთ ინფრასტრუქტურაში ჩადებას, სადაც განვითარების დიდი პოტენციალია და კერძო ინვესტიციების მოზიდვაა შესაძლებელი.
