თელავში ნადიკვრის პარკისა და მრავალსართულიანი კორპუსების ფასადის რეაბილიტაცია იგეგმება. ინფორმაციას კახეთის ხმა ავრცელებს.
თელავის მერის შოთა ნარეკლიშვილის თქმით, აღნიშნული ინფრასტრუქტურული პროექტების განსახორციელებლად 2 მილიონამდე ლარია გამოყოფილი.
“ვიწყებთ ნადიკვრის პარკის რეაბილიტაციას, რომელიც ითვალისწინებს ამფითეატრის გადახურვასა და ინფრასტრუქტურის მოწესრიგებას. აღნიშნული პროექტისთვის 400 000 ლარია გათვალისწინებული.
ამასთან, ჭავჭავაძის ქუჩა 2-ში მდებარე მრავალსართულიანი საცხოვრებელი სახლის ფასადს რეაბილიტაცია ჩაუტარდება. ხოლო, ქეთევან წამებულის ქუჩაზე, ე.წ. ყადორის ბინების ფასადები შეიღებება. ფასადების რეაბილიტაციისთვის გამოყოფილია 1 323 000 ლარი”, – განაცხადა შოთა ნარეკლიშვილმა.
