სოფელი ხიდისყური კასპისა და მცხეთის მუნიციპალიტეტების მიჯნაზე მდებარეობს. სასმელი წყლის მილები ერთი მხრიდანაც გაყვანილია და მეორე მხრიდანაც. მიუხედავად ამისა, ხრიოკ ადგილზე გაშენებული დასახლება უწყლობას განიცდის. ინფორმაციას შიდა ქართლის საინფორმაციო ცენტრი ავრცელებს.
2016 წელს სოფელ ხიდისყურში კასპის მერიამ 700 000-ლარიანი პროექტის განხორციელება დაიწყო. გარემონტდა კომუნისტების პერიოდში დადგმული რეზერვუარი. მილებით ნახევარი სოფელი დაქსელეს. დანარჩენი ნახევარი სოფელი მცხეთის მხრიდან გაყვანილი წყლის იმედად დატოვეს:
,,დღეს არც ერთი მხრიდან გვაქვს წყალი, არც – მეორე” – ამბობს საბირა ალიოღლი, რომლის სახლში შვილის ოჯახი ცხოვრობს თავისი შვილებით. მისი სახლი სოფლის ზედა ნაწილშია აშენებული. მანქანა გაუფუჭდა, რომლითაც წყალს იმარაგებდა.
,,ვერ წარმოიდგენთ, რა მდგომარეობაში ვართ. ძალიან ხრიოკი ადგილია. სარწყავი წყალიც კი არაა, რომ აქ ხეებმა იხაროს. ჩვენი ყოფა გაუსაძლისია,” – ამბობს საბირა ალიოღლი.
ხიდისყურელი გულო ბაირამოვი ამბობს, რომ კასპის მერია ხიდისყურის წყლის პრობლემას რამდენიმე წელია ვერ აგვარებს. მას 2015 წელს სოფელში ჩვენი ვიზიტიც ახსოვს, ზუსტად ანალოგიურ პრობლემაზე:
,,იმის მერე იმედი გაგვიჩნდა. დაიწყეს საკითხის მოგვარება, მაგრამ არაფერი გამოვიდა. როგორც ვხედავთ, კასპის ხელისუფლებას არ შეუძლია ჩვენი პრობლემის მოგვარება. თვითონ ქალაქ კასპის მცხოვრებლებს ვერ მოუგვარეს წყლის პრობლემა და ჩვენ მოგვიგვარებენ? უფრო მეტად მცხეთასთან ვართ ახლოს და მცხეთის მუნიციპალიტეტის ხელმძღვანელობას საშუალება და უფლება რომ ჰქონდეს, ჩვენს საკითხს უფრო გადაწყვეტდა”, – ამბობს გულო ბაირამოვი.
კასპის ყოფილი გამგებელი გოჩა გოჩიტაშვილი ამბობს, რომ მის პერიოდში დაწყებული საქმე ერთ-ერთი მნიშვნელოვანი პროექტი იყო მისი მოღვაწეობის პერიოდში: ,,ჩემ დროს ძალიან დიდი საქმე გავაკეთეთ ხიდისყურში. ახლა რა ხდება არ ვიცი, მაგრამ ვიცი, რომ ეს პრობლემა მოგვარებული იყო” – აცხადებს გოჩა გოჩიტაშვილი.
ხიდისყურელები ამბობენ, რომ სოფლისთვის გამოყოფილი 700 000 ლარი ეფექტურად არ გაიხარჯა.
ხიდისყურში მცხოვრები რახიდ შარიფოვი ამბობს, რომ უბნების დიდი ნაწილი მოსახლეობამ საკუთარი სახსრებით დაქსელა: ,,ჩვენ ჩვენი საკუთარი ფინანსებიც გავიღეთ, რომ უბნებში ქსელი გაკეთებულიყო. ერთი კვირა იმუშავა ამ ახალმა სისტემამ, ერთი კვირა,” – ამბობს რახიდ შარიფოვი.
მისი თქმით, ხელისუფლებამ აუცილებლად ყურადღება უნდა მიაქციოს ამ სოფელს, რადგან არაა გამორიცხული ეპიდემია გავრცელდეს: ,,ჯერ ერთი, ის ბასეინები უპატრონოდაა მიგდებული. იქიდან თუ დღეში ერთი საათი უშვებენ წყალს, არავინ იცის, იმ ბასეინიდან რა წყალი მოდის. მეორეც, ის მცირე წყალი მხოლოდ იმ უბანს ყოფნის, რომელიც დაბლობშია. თანაც მრიცხველები არ აყენია და მოსახლეობა სარწყავადაც იყენებს. აუცილებელია, საჭირო ზომების მიღება,’ – აცხადებს რახიდ შარიფოვი.
კიდევ უფრო სავალალო მდგომარეობაშია ხიდისყურის დასახლების ის ნაწილი, რომელსაც ,,დაჩებს” უწოდებენ. სააგარაკო დასახლება რკინიგზის მეორე მხარეს მდებარეობს. იქ საერთოდ არაა გაყვანილი წყალი.
