“ნაციონალური მოძრაობის” პროვოკაციული ქმედებები ვითარების ესკალაციას ემსახურება”, – ამის შესახებ “ქართული ოცნების” მიერ გავრცელებულ განცხადებაშია ნათქვამი. განცხადება პარტიამ ოზურგეთში მომხდარი იმ ინციდენტის შემდეგ გაავრცელა, რომლის დროსაც ოზურგეთის საკრებულოს “ნაცმოძრაობის” დეპუტს მმართველი პარტიის დეპუტატმა სცემა.
“გვსურს, გამოვეხმაუროთ ბოლო პერიოდში “ერთიანი ნაციონალური მოძრაობის” მხრიდან დაგეგმილ პროვოკაციულ ქმედებებს, რაც ვითარების ესკალაციას ისახავს მიზნად. როგორც ჩანს, “ნაციონალური მოძრობა” პოლიტიკურ პროცესებში მონაწილეობის ერთადერთ გზად დესტრუქციულ მეთოდებს ირჩევს. სწორედ ასეთი ქმედებების ნაწილად ვაფასებთ გუშინ ოზურგეთის საკრებულოში მომხდარ ინციდენტს. თუმცა, აქვე ვაცხადებთ, რომ ვემიჯნებით ძალადობის ნებისმიერ გამოვლინებას და პროვოკაციების მიუხედავად, დაუშვებლად მიგვაჩნია ფიზიკური დაპირისპირება.
ყველას კარგად უნდა ესმოდეს, რომ სახელმწიფო არ დაუშვებს ვითარების ესკალაციას. ყველა მსგავს ინციდენტზე შესაბამისი სამსახურები მოახდენენ ადეკვატურ რეაგირებას.
მივმართავთ ჩვენი პოლიტიკური ორგანიზაციის წევრებს, მხარდამჭერებს – ჩვენ მაღალი პოლიტიკური პასუხისმგებლობა გვაკისრია და ჩვენი ხელწერა ყოველთვის იყო და იქნება მხოლოდ კანონისმიერი პასუხი ყველა პროვოკაციაზე. ამიტომ, ყველას მოგიწოდებთ, არ აჰყვეთ არანაირ პროვოკაციას. ნურავის მივცემთ საშუალებას, ხელოვნურად მოახერხონ სიტუაციის ესკალაცია.
აქვე, გვსურს აღვნიშნოთ, რომ არსებობს საჯარო სივრცეში მიზანმიმართული მუქარისა და შეურაცხყოფის არაერთი ფაქტი, რომელიც აუცილებლად გადაეცემა სამართალდამცავ უწყებებსა და საერთაშორისო ორგანიზაციებს. საქართველო სამართლებრივი სახელმწიფოა და ყველა ის ადამიანი, რომელიც კანონს დაარღვევს, სათანადოდ აგებს პასუხს, მიუხედავად მისი პოლიტიკური, თუ თანამდებობრივი პოზიციისა”, – ნათქვამია “ქართული ოცნების” განცხადებაში.
ინციდენტი ოზურგეთში გუშინ, 15 ივნისს მოხდა. მუნიციპალიტეტის საკრებულოს “ნაციონალური მოძრაობის” წევრს, ბესიკ ქათამაძეს “ქართული ოცნების” ამავე საკრებულოს “ქართული ოცნების” წევრმა ტარიელ აროშიძემ სცემა. ამ ფაქტის გამო გვიან ღამემდე ოზურგეთში ვითარება დაძაბული იყო – საკრებულოს ადმინისტრაციული შენობის წინ “ნაცმოძრაობისა” და მოქალაქეების საპროტესტო აქცია გაიმართა. ამ დროისთვის აროშიძეს ბრალი უკვე წარედგინა.
