რაც დღეს ქუთაისში ხდება, ეს არის ხელისუფლებისა და კრიმინალების მიერ ერთობლივად ჩატარებული სპეცოპერაცია, რასაც არაფერი აქვს საერთო არჩევნებთან – აცხადებს “ნაციონალური მოძრაობის” ქუთაისის მერობის კანდიდატი გრიგოლ ვაშაძე.
“მისი თქმით, ტოტალურ მოსყიდვებსა და დაშინებებს თან დაერთო კონკრეტულ საარჩევნო უბნებზე კანონის უხეში დარღვევები.
მერობის კანდიდატი “ნაციონალური მოძრაობის” მიერ დაფიქსირებულ დარღვევათა ჩამონათვალს ავრცელებს.
1. ქუთაისის #41 -ე საარჩევნო უბანზე იდენტიფიცირებულ იქნა რამოდენიმე ამომრჩეველი, რომელიც არ იყო რეგისტრირებული მითითებულ საარჩევნო უბანზე.
2. გადასატანი ყუთის სიებში მყოფი ამომრჩევლები არ იყვნენ მონიშნული სამაგიდო სიებში, და კონკრეტულად #72 და #63 უბანზე რამოდენიმე ამომრჩეველმა ხმა მისცა როგორც საარჩევნო უბანზე, ასევე საცხოვრებელ მისამართზე. (ანა ჩუბინიძე – მც. ხარებავას 6/48).
3. 99-ე საარჩევნო უბანზე კომისიის წევრმა ხმა მისცა მაჟორიტარ კანდიდატს, რაც ასევე კანონის უხეში დარღვევაა.
4. 66-ე საარჩევნო უბანზე ადგილი ქონდა ჩვენი წარმომადგენლის საარჩევნო უბნიდან გამოძევების მცდელობას.
5. #96, 91, 86, 93, 88 საარჩევნო უბნებზე კომისიის თავმჯდომარის მიერ ადგილი ქონდა ჩვენი წარმომადგენლებისათვის კანონით მინიჭებული უფლებების განხორციელებაში ხელის შეშლას, კერძოდ ვიდეოკამერებით სარგებლობით შეზღუდვას.
6. თითქმის ყველა საარჩევნო უბნის ტერიტორიაზე ქართული ოცნების მხრიდან ფიქსირდება როგორც ხელისუფლების წარმომადგენელთა, ასევე ადგილობრივი კრიმინალების ერთობლივი ზეწოლა ამომრჩევლებზე.
7. ჩვენი საუბნო საარჩევნო კომისიის წევრების მიერ ამ დროისათვის დაწერილია ათეულობით საჩივარი. ამ ფაქტების მიუხედავად, გადამწყვეტია ქუთაისელი ამომრჩევლის აქტიურობა, რათა კრიმინალთან შეზრდილმა ხელისუფლებამ ვერ მოახერხოს და ვერ მოპაროს პატიოსან ქუტაისელ ამომრჩეველს საკუთარი არჩევანი და მოვუწოდებ ყველა ქუთაისელს მაქსიმალური აქტიურობისკენ.
წყარო: ნიუპრესი
