წელს დაგეგმილია ცენტრალური ავტომაგისტრალის სამტრედია-გრიგოლეთის პირველი და მეოთხე მონაკვეთების დასრულება – აღნიშნული გზა გამოწვევებით სავსე იყო, მიუხედავად ამისა, ჯამში, 21 კმ გზა უკვე წელს დასრულდება, რაც ზესტაფონის არგვეთას კვანძიდან ლანჩხუთამდე 86 კმ-იანი ჩქაროსნული მაგისტრალური გზით გადაადგილების საშუალებას მოგვცემს, – ამის შესახებ რეგიონული განვითარებისა და ინფრასტრუქტურის მინისტრმა, ირაკლი ქარსელაძემ პარლამენტში “მინისტრის საათზე” გამოსვლისას განაცხადა.
ქარსელაძის ინფორმაციით, სამტრედია-გრიგოლეთის გზის პირველ და მეოთხე მონაკვეთებზე ქართული კომპანიები მუშაობენ, ხოლო მესამე მონაკვეთის ასაშენებლად სატენდერო პროცედურები ახლა მიმდინარეობს.
“ინტენსიური სამუშაოები მიმდინარეობს გრიგოლეთი-ქობულეთის 14 კმ-იან მონაკვეთზე, საიდანაც წელს – 11 კმ-ის, ხოლო 2023 წელს დარჩენილი 3 კმ-ის დასრულება არის დაგეგმილი. შესაბამისად, 2022 წელს დაგეგმილი საგზაო მონაკვეთების გახსნის შედეგად, თბილისიდან ბათუმამდე გადაადგილების დრო კიდევ უფრო შემცირდება და მგზავრობას მხოლოდ 3 საათსა და 40 წუთს მოვანდომებთ”, – განაცხადა ირაკლი ქარსელაძემ.
