“ქართული ოცნების” თავმჯდომარის, ირაკლი კობახიძის განცხადებით, საკონსტიტუციო ცვლილებების მიღების შანსი 50/50-ზეა. მისი თქმით, მმართველი პარტია ბარიერის დაწევაზე თანახმა იქნება, თუ ისეთი მოცემულობა ჩამოყალიბდება, რაც ამას უკეთესს გახდის.
“მე, უხეშად რომ ვთქვათ, მგონია, რომ საკონსტიტუციო ცვლილებების გასვლის შანსი არის 50/50-ზე, ეს არის ჩემი უხეში შეფასება. ვნახოთ, როგორ გაგრძელდება პროცესები. კიდევ ერთხელ გავიმეორებ, რომ რომც დარჩეს არსებული სისტემა, ეს არის პროპორციული, თავისი 5%-იანი ბარიერით, და არის აბსოლუტურად დემოკრატიული, შეიძლება, იყოს უკეთესიც კი, თუნდაც მუდმივად და გრძელვადიანში თავისთავად უკეთესი იქნება. თუ იქნება ისეთი მოცემულობა ჩამოყალიბებული, რომელიც უკეთესს გახდის უფრო დაბალ ბარიერს, რა თქმა უნდა, ამისთვის ჩვენც ვართ მზად”, — განაცხადა მან პირველი არხის ეთერში.
მისი განცხადებით, ამ პროცესის განახლება დამოკიდებულია იმაზე, თუ რამდენად არიან პოლიტიკური პარტიები საპარლამენტო ცხოვრებაში “კონსტრუქციული მონაწილეობისთვის” მზად.
“უნდა მივიღოთ განგრძობითი მტკიცებულება. შეიძლება, 2022-ში, შეიძლება, 2023-ში, შეიძლება, 2024-ში მივიღოთ მესამე მოსმენით. ვნახოთ, ესეც არის დამოკიდებული, რა თქმა უნდა, წინაპირობებზე. ჩვენ უნდა შევხედოთ პოლიტიკური პარტიები არიან თუ არა მზად საპარლამენტო ცხოვრებაში კონსტრუქციული მონაწილეობისთვის. თუ ამას აჩვენებ და როცა აჩვენებენ, რა თქმა უნდა, განახლდება ეს პროცესი.
მთავარი არის სწორედ ეს, რომ მათ უნდა აჩვენონ ასეთი მზაობა, უნდა დაასრულონ საუბარი რიგგარეშე არჩევნებზე, ეს ერთი და ამას გარდა, მათ უნდა აჩვენონ, რომ შეუძლიათ ჩაერთონ პოლიტიკურ დისკუსიებში სხვადასხვა თემასთან დაკავშირებით. აქედან გამომდინარე, ჩვენ, რა თქმა უნდა, დაველოდებით მათ მოქმედებებს”, — თქვა კობახიძემ.
ქართული ოცნების თავმჯდომარემ, ირაკლი კობახიძემ 30 ნოემბერს განაცხადა, რომ 2%-იანი საარჩევნო ბარიერი მათ “კეთილ ნებაზე იქნება დამოკიდებული”. მან, ასევე, აღნიშნა, რომ საკონსტიტუციო ცვლილებების მიღების არავითარი აუცილებლობა არ არსებობს.
შარლ მიშელის შეთანხმების საფუძველზე შემუშავებული კანონპროექტი გულისხმობდა, საკონსტიტუციო ცვლილებებს საარჩევნო ბარიერზე, ფრაქციების შექმნასა და გენერალური პროკურორის არჩევის წესის ცვლილებას. პროექტის მიხევდით, მომავალ ორ საპარლამენტო არჩევნებში ბარიერი ბუნებრივსა და 2%-ს შორის უნდა ყოფილიყო, ხოლო ფრაქციის ჩამოსაყალიბებლად საკმარისი უნდა ყოფილიყო მინიმუმ 4 წევრი, მათ შორის, მაჟორიტარები.
ქართულმა ოცნებამ შარლ მიშელის შეთანხმება ანულირებულად გამოაცხადა. ირაკლი კობახიძემ პარტიის პოლიტსაბჭოსა და უმრავლესობის სხდომის შემდეგ გამართულ ბრიფინგზე გამოაცხადა, რომ შეთანხმებას მხოლოდ ისინი ასრულებდნენ კეთილსინდისიერად, რაც არასწორია. მათი აზრით, 100 დღეში თავი ამოწურა დოკუმენტმა, რომლის გამოც შარლ მიშელი და კრისტიან დანიელსონი საქართველოს არაერთხელ ეწვივნენ და რომლის მიღებაშიც არაერთი ქვეყნის ელჩი იყო ჩართული.
