თბილისის საქალაქო სასამართლოს მოსამართლეთა კოლეგიამ ლია ორკოდაშვილის, ნინო ელიეშვილისა და მაია ქოქიაშვილის შემადგენლობით, 7 ნოემბრის საქმეზე საქართველოს მესამე პრეზიდენტისთვის შეფარდებული აღკვეთის ღონისძიება პატიმრობა გააუქმა.
მოსამართლე ელიეშვილმა განმარტა, რომ სასამართლო აღკვეთის ზომად, პატიმრობის გამოყენების აუცილებლობას ვეღარ ხედავს.
ცნობისთვის, 7 ნოემბრის საქმე იყო ერთადერთი, რომელზეც მესამე პრეზიდენტს აღკვეთის სახით, წინასწარი პატიმრობა ჰქონდა შეფარდებული.
ამ გადაწყვეტილების შემდეგ, მიხეილ სააკაშვილს უნდა მიეცეს სატელეფონო ზარების განხორციელების უფლება.
ამავე საქმეზე ბრალდებულების, ზურაბ ადეიშვილისა და დავით კეზერაშვილის მიმართ გამოყენებული აღკვეთი – პატიმრობა კი უცვლელი დარჩა, რადგან მოსამართლის თქმით, ახალი გარემოება არ ყოფილა წარმოდგენილი.
საქმის განხილვა 29 ნოემბერს გაგრძელდება.
დღევანდელ პროცესზე, რომელიც 4 საათს გაგრძელდა, მოსამართლემ უარი თქვა, მიხეილ სააკაშვილი პროცესზე დისტანციურად ან ტელეფონით ჩართულიყო. ნინო ელიეშვილის თქმით, ექსპრეზიდენტს ამის საშუალება შემდეგ პროცესზე მიეცემა.
სასამართლოს დარბაზში მიხეილ სააკაშვილის გადაყვანაზე უარი განაცხადა იუსტიციის სამინისტომ. მათი განცხადებით, შესაძლოა, გადაყვანის დროს “შესაძლოა მომხდარიყო დესტრუქციული ქმედებები 500-600 მანქანის მონაწილეობით”.
შეგახსენებთ, პროკურატურა მიხეილ სააკაშვილს 2007 წლის 7 ნოემბერს, მომიტინგეთა მასობრივად დარბევას, ტელეკომპანია „იმედში“ შეჭრასა და ბადრი პატარკაციშვილის კუთვნილი ქონების დანაშაულებრივად ხელში ჩაგდებას ედავება.
მიხეილ სააკაშვილს ბრალი საქართველოს სს კოდექსის 333-ე მუხლის მესამე ნაწილით აქვს წარდგენილი, რაც სამსახურებრივი უფლებამოსილების გადამეტებას გულისხმობს და 5-დან 8 წლამდე ვადით თავისუფლების აღკვეთას ითვალისწინებს.
მიხეილ სააკაშვილი მსჯავრდებულია ვალერი გელაშვილის ცემისა და სანდრო გირგვლიანის მკვლელობაში მსჯავრდებული პირების შეწყალების საქმეებზე.
გელაშვილის საქმეზე მას 6 წლით თავისუფლების აღკვეთა აქვს მისჯილი, ხოლო გირგვლიანის საქმეზე 3 წლით თავისუფლების აღკვეთა.
შესაბამისად, დღევანდელი გადაწყვეტილების მიუხედავად, მიხეილ სააკაშვილი კვლავ პატიმრობაში რჩება.
