კახეთში სახელმწიფო რწმუნებულს ახალი პირველი მოადგილე ჰყავს. ვაკანტურ თანამდებობაზე, გუბერნატორმა ირაკლი შიოშვილმა, პლატონ კალმახელიძე დანიშნა. პირველი მოადგილის თანადებობაზე დანიშვნა, რადიო ჰერეთს, თავად კალმახელიძემ დაუდასტურა.
” გიდასტურებთ, რომ, გუშინ, 19 მაისს დავინიშნე პირველ მოადგილედ. იცით, რომ პირველი მოადგილე, ირაკლი შიოშვილი გუბერნატორად გადაიყვანეს. ეს პოსტი, მას შემდეგ ვაკანტური იყო”- განაცხადა კალმახელიძემ.
პირველ მოადგილედ დანიშვნამდე, კალმახელიძე, კახეთის ყოფილი გუბერნატორის, ირაკლი ქადაგიშვილის მოადგილის თანამდებობაზე მუშაობდა და 2020 წლის ოქტომბრის საპარლამენტო არჩევნების დროს, ქადაგიშვილის საარჩევნო შტაბის უფროსი იყო.
პლატონ კალმახელიძე, 2014-2017 წლებში თელავის არჩეული მერის პოსტს იკავებდა.
2017 წლის 21 ოქტომბრის ადგილობრივი თვითმმართველობის არჩევნებისთვის „ქართული ოცნება“ მას, თელავის მუნიციპალიტეტის მერობის კანდიდატად კვლავ განიხილავდა. მოგვიანებით, პარტიამ გადაწყვეტილება შეცვალა და 2017 წლის 4 სექტემბერს, თელავის მერობის კანდიდატად, შოთა ნარეკლიშვილი დაასახელა.
კახეთში სახელმწიფო რწმუნებულის პირველი მოადგილის თანამდებობა, ვაკანტური 2021 წლის 9 თებერვლიდან, ირაკლი შიოშვილის რეგიონის გუბერნატორად დანიშვნის შემდეგ გახდა.
