2020 წელს ქარელის მერიის ბიუჯეტიდან 140 000 ლარი რუის-ურბნისის ეპარქიას გადაურიცხეს. ამის შესახებ საკრებულოს სხდომაზე ა(ა)იპ “ქარელის კულტურისა და ხელოვნების ცენტრის” ხელმძღვანელმა მერი არხოშაშვილმა განაცხადა. ინფორმაციას შიდა ქართლის საინფორმაციო ცენტრი ავრცელებს.
მან საკრებულოს წევრებს 2020 წლის განმავლობაში ა(ა)იპ-ის მიერ გაწეული მუშაობის ანგარიში წარუდგინა. ანგარიშის მიხედვით 140 000 ლარი საკულტო ნაგებობების აშენებისა და რეაბილიტაციის მიზნით დაიხარჯა.
მათ შორის, 100 000 (ასი ათასი) ლარი ქარელში სამღვდელმთავრო რეზიდენციის, ხოლო 30 000 ლარი ქოზიფას მონასტერში კელიების რეაბილიტაციას მოხმარდა.
როგორც ა(ა)იპ-ის ხელმძღვანელი ანგარიშში განმარტავს, ქოზიფას მამათა მონასტერში, კელიების გარდა, რეაბილიტაცია ბიბლიოთეკას ჩაუტარდა.
რაც შეეხება დანარჩენ 10 000 ლარს, ეს თანხა ბრეთის ეკლესიის ეზოს რეკონსტრუქციის მიზნით გადარიცხეს.
