დღეს საარჩევნო სუბიექტებს პროპორციული წესით პარტიული სიების წარდგენის ბოლო დღე აქვთ.
“საარჩევნო კოდექსის” თანახმად, არჩევნებში დამოუკიდებლად მონაწილე პარტიები და საარჩევნო ბლოკები, პროპორციული საარჩევნო სისტემის საფუძველზე საკრებულოს არჩევნებში მონაწილეობის მისაღებად, შესაბამისი საოლქო საარჩევნო კომისიის თავმჯდომარეს წარუდგენენ პარტიულ სიებს, ხოლო პროპორციული წესით ქ. თბილისის საკრებულოს წევრთა მანდატების მისაღებად პარტია/საარჩევნო ბლოკი პარტიულ სიებს წარუდგენს ცესკოს.
პარტიულ სიას ამოწმებს შესაბამისი საარჩევნო კომისიის თავმჯდომარე, რომელიც მისი წარდგენიდან 2 დღის ვადაში, მაგრამ არა უგვიანეს არჩევნების დღემდე 28-ე დღისა, საარჩევნო რეგისტრაციაში ატარებს პარტიულ სიას იმ შემთხვევაში, თუ წარდგენილი პარტიული სია და თანდართული საბუთები აკმაყოფილებს საარჩევნო კოდექსით დადგენილ მოთხოვნებს.
თუ არჩევნებში მონაწილე პარტიას ან ბლოკს დაუდგინდა ხარვეზი, საარჩევნო ადმინისტრაცია წერილობით აცნობებს საარჩევნო სუბიექტის წარმომადგენელს საარჩევნო კოდქსით დადგენილ მოთხოვნებთან პარტიულ სიასა და თანდართულ საბუთებში არსებული მონაცემების შეუსაბამობის შესახებ და მიუთითებს კონკრეტულ შეუსაბამობას. პარტიის/საარჩევნო ბლოკის წარმომადგენელს სიისა და საბუთების სრულყოფისთვის 2 დღე ეძლევა.
