NDI-ს მიერ გამოკითხულთა 82% პოლიტიკური პარტიების ერთმანეთთან თანამშრომლობას მნიშვნელოვნად მიიჩნევს, რათა ახალმა პარლამენტმა მათი ინტერესები გაატაროს.
NDI-მ პარლამენტის მიმართ მოქალაქეების დამოკიდებულება შეისწავლა. კვლევის თანახმად, კითხვაზე – „იმისათვის, რომ ახალმა პარლამენტმა ჩემნაირი ადამიანის ინტერესები გაატაროს, მნიშვნელოვანია, რომ ყველა პოლიტიკურმა პარტიამ ერთმანეთან ითანამშრომლოს“, გამოკითხულთა 82%-მა განაცხადა, რომ ეთანხმება, 9% არ ეთანხმება, ამდენივეს კი პასუხი არ აქვს.
ამასთან, გამოკითხულთა 76% მიიჩნევს, რომ ყველა არჩეულმა პარტიამ პარლამენტის საქმიანობაში მონაწილეობა უნდა მიიღოს, 13% ამ მოსაზრებას არ ეთანხმება, 11%-ს კი ამ კითხვაზე პასუხი არ აქვს.
კვლევა 2020 წლის 17-24 დეკემბრის პერიოდში საქართველოს მასშტაბით, 2 053 სატელეფონო ინტერვიუს წარმომადგენლობითი შერჩევის საფუძველზე, ქვეყნის სრულწლოვან მოსახლეობას შორის ჩატარდა (ოკუპირებული ტერიტორიების გამოკლებით). გამოკითხვის საშუალო ცდომილების ზღვარია ±1.1 პროცენტი. რესპონდენტები შემთხვევით ნომერზე დარეკვის მეთოდით შეირჩნენ.
