“ჯორჯიან უოთერ ენდ ფაუერის” გენერალური დირექტორის, ირაკლი ბაბუხადიას განაცხადებით, 2018-2020 წლებში “ჯივიპიმ” წყალმომარაგების სისტემის განახლებისთვის სარეაბილიტაციო პროექტები თბილისის ყველა რაიონში ჩაატარა.
ბაბუხადიას თქმით, 400-ზე მეტ ქუჩაზე შეიცვალა 250 კმ წყალსადენისა და წყალარინების ქსელი, შედეგად შემცირდა მილსადენებზე დაზიანებები და წყალმომარაგებასთან დაკავშირებული დისკომფორტი. მნიშვნელოვნად გაუმჯობესდა კომპანიის მომსახურების ხარისხი.
მისივე განცხადებით, მომდევნო წლებში იგეგმება არაერთი მსხვილი პროექტი, რაც კიდევ უფრო საიმედოს გახდის დედაქალაქის წყალმომარაგებას.
,,ბოლო სამ წელიწადში კომპანიამ 300 მილიონ ლარამდე ინვესტიცია განახორციელა წყალმომარაგების სისტემის განახლება – განვითარების მიზნით. ჯივიპი გააგრძელებს ქალაქის ყველა რაიონში სისტემების განვითარებაზე ზრუნვას და ინფრასტრუქტურის რეაბილიტაციას მოსახლეობის მაღალი ხარისხის სასმელი წყლით უზრუნველყოფის მიზნით”, – განაცხადა ირაკლი ბაბუხადიამ.
ასევე, ბაბუხადიას თქმით, 2018-2020 წლებში ახალი მაგისტრალური ქსელები მოეწყო ისეთ დასახლებებში, სადაც მაცხოვრებლებს მუდმივი წყალმომარაგება და გამართული ქსელი არასდროს ჰქონიათ.
