“გირჩის” ერთ-ერთი ლიდერის, იაგო ხვიჩიას თქმით, “ქართული ოცნების” აღმასრულებელმა მდივანმა, ირაკლი კობახიძემ იცის ოპოზიციის სუსტი მხარე და ის, რომ თანხა მნიშვნელოვანია, ამიტომ დაფინანსების შეწყვეტით აშანტაჟებს მათ. ასე გამოეხმაურა იგი, მმართველი გუნდის ინიციატივას, რომ დაფინანსება შეუწყვიტოს ყველა პარტიებს, რომელიც მანდატებზე უარს იტყვის.
“გირჩი როგორ არსებობს? გირჩს ხომ არ აუღია საბიუჯეტო დაფინანსება? ჩვენ 300 ათასი ლარი დაგვიჯდა საარჩევნო კამპანია, მაგრამ ეს 300 ათასი შემოგვწირეს. სხვა პარტიებს მილიონები დაუჯდათ. თუ მე სწორ პოლიტიკურ გადაწყვეტილებას მივიღებ, კიდევ ვიშოვი 300 ათასს, სხვა პოლიტიკური პარტიები კი ფიქრობენ, რომ მილიონების გარეშე ვერ გადარჩებიან. 300 ათასს ვერ იშოვიან? უბრალოდ 300 ათასი არ უნდათ, მილიონები უნდათ. როდესაც მილიონები გინდა, თან ბოიკოტი გინდა, მაშინ გამოდის კობახიძე — ისეთი, როგორიც არის, ხომ ვერ გამოვასწორებთ კობახიძეს? — გამოდის და გაშანტაჟებს. კარგი კი არ არის მისი საქციელი, ვგმობთ, საგიჟეთია, არაცივილური ქცევაა, მაგრამ ეს საფუძველიც არ მივცეთ და ვერ გვაშანტაჟებდეს”, — განაცხადა ხვიჩიამ ფორმულას ეთერში.
მისივე განცხადებით, მას, როგორც ბოიკოტის ნამდვილ მომხრეს, “ვისაც ფულიც კი არ აუღია სხვა პარტიებისგან განსხვავებით”, ბოიკოტის წარმატება უნდა და ეს სწორედ იმაზეა დამოკიდებული მისი კოლეგები დაშანტაჟდებიან თუ არა.
“როცა მე ეს ვუთხარი, მაშინ მითხრეს — ჩვენ ვერ გადავრჩებით სხვანაირადო, დაგვეშლება პარტიული სტრუქტურები და ა.შ. ეს მე თუ ვიცი, კობახიძემ არ იცის? ჩვენ მართლა უნდა დავკრისტალდეთ ოპოზიცია, იდეებმა უნდა შეგვკრას და არა ბიუჯეტიდან მიღებულმა ფულმა”, — თქვა ხვიჩიამ.
“გირჩის” ლიდერის თქმითვე, ეს ახალი ინიციატივა მას ვერ შეეხება, რადგან პარტია არც საბიუჯეტო დაფინანსებას იღებს და პარლამენტში შესვლის შემთხვევაში, არც ხელფასის აღებას აპირებდნენ.
“მე მგონია, რომ ეს მუქარა ჩემზე არ არის. მე ვერც ფულს ჩამომაკლებ, უარი მაქვს ნათქვამი და ისედაც არ ველოდები, რომ ფულს მივიღებ. პარლამენტის ხელფასს ვერ დამიკავებენ იმიტომ, რომ პარლამენტში ჯერ არ შევსულვარ და ვერც ვხედავთ შესვლის პერსპექტივას, მაგრამ რომც შევულიყავით, ხელფასის აღებას მაინც არ ვაპირებდი. არც საბიუჯეტო დაფინანსების გამოყენებას არ ვაპირებდით. შესაბამისად, ეს მუქარა ეხებათ ჩემს კოლეგებს, რომელთაც მე დიდი ხანი ვაფრთხილებდი, რომ თუ ბოიკოტს ვაპირებთ, არ უნდა ვიყოთ ისეთ მდგომარეობაში, რომ ბატონმა კობახიძემ მუქარა შეძლოს”, — განაცხადა ხვიჩიამ.
მმართველი პარტიის აღმასრულებელი მდივნის, ირაკლი კობახიძის განცხადებით, დეპუტატებს, რომლებიც მანდატებზე უარს იტყვიან, არამხოლოდ მანდატებს შეუჩერებენ, არამედ პარტიებს საბიუჯეტო დაფინანსებასაც შეუწყვეტენ. ამასთან, მისი თქმით, დააინიცირებენ ახალ კანონპროექტს, რომლის მიხედვითაც, საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.
