საგარეჯოს სოფელ პატარძეულის სტაბილური წყალმომარაგებისთვის საჭირო სამუშაოს 12 მილიონი ლარი მოხმარდება

302

საქართველოს გაერთიანებული წყალმომარაგების კომპანიამ გამოაცხადა ტენდერი საგარეჯოს მუნიციპალიტეტის სოფელ პატარძეულის წყალმომარაგების სისტემის საპროექტო – სამშენებლო სამუშაოზე.

მონაწილეობის მსურველებს წინადადებების წარდგენა 16 ნოემბრის ჩათვლით შეუძლიათ. პროექტის სავარაუდო ღირებულება 12 მილიონი ლარია. ტენდერში გამარჯვებულ კომპანიას სამუშაოს შესასრულებად 32 თვე ექნება.

ამ დროისთვის, პატარძეულის მოსახლეობას წყალი შეზღუდული გრაფიკით მიეწოდება. არ არსებობს წყალმომარაგების ცენტრალიზებული სისტემა.

დაგეგმილი სამუშაოს ფარგლებში, მოეწყობა წყალმომარაგების ქსელი, მაგისტრალური მილდენი, წყლის სათავე ნაგებობა, სატუმბო სადგური, რეზერვუარი და დაგეგმილია მოსახლეობის ინდივიდუალური გამრიცხველიანება. პროექტის დასრულების შემდეგ, ადგილობრივ მოსახლეობას ათწლეულების განმავლობაში არსებული პრობლემა მოუგვარდება და 3000 ადამიანი სტაბილური წყალმომარაგებით ისარგებლებს.