ცენტრალური საარჩევნო კომისიის საინფორმაციო/სატელეფონო ცენტრში ყრუ და სმენადაქვეითებულ ამომრჩევლებს ინფორმაციის მიღება დღეიდან ვიდეოზარის მეშვეობით, ჟესტურ ენაზე შეეძლებათ. ახალი სერვისის პრეზენტაცია დღეს ცესკოში გაიმართა და მას ცესკოში შექმნილი შეზღუდული შესაძლებლობების მქონე პირთა საკითხებზე მომუშავე ჯგუფის წევრები და ყრუთა კავშირის წარმომადგენლები დაესწრნენ.
პრეზენტაცია ცესკოს თავმჯდომარე თამარ ჟვანიამ გახსნა და ახალი სერვისის მნიშვნელობაზე, ასევე 21 ოქტომბრის არჩევნების მაღალპროფესიულ დონეზე ჩატარების მიზნით განხორციელებულ აქტივობებზე ისაუბრა.
დეტალური ინფორმაცია ჟესტურ ენაზე ოპერატორის მომსახურების შესახებ მოწვეულ სტუმრებს ცესკოს კოორდინაციის, დაგეგმვისა და ანგარიშგების დეპარტამენტის უფროსმა გააცნო. სოფიო სიჭინავამ აღნიშნა, რომ სერვისით სარგებლობისთვის საჭიროა წინასწარი რეგისტრაცია, რის შემდეგაც ყრუ და სმენადაქვეითებულ პირებს ვიდეო ზარის საშუალებით საარჩევნო პროცედურებთან დაკავშირებით ინფორმაციის ჟესტური ენის მცოდნე ოპერატორებისგან მიღება შეეძლებათ. მათ, ასევე საშუალება ექნებათ გადაამოწმონ პირადი მონაცემები და მისამართი ამომრჩეველთა ერთიან სიაში. დღესვე შეხვედრაზე განხორციელდა საჩვენებელი ვიდეოზარიც.
როგორც ყრუთა კავშირის პრეზიდენტმა ამირან ბატატუნაშვილმა განაცხადა, ახალი სერვისი განსაკუთრებით მნიშვნელოვანია იმით, რომ ის ხელმისაწვდომია მთელი საქართველოს მასშტაბით და ვიდეოზარით სარგებლობას რეგიონში მცხოვრები ამომრჩევლებიც შეძლებენ. მისივე თქმით, ცესკოს ახალი სერვისი კომუნიკაციის პრობლემის მოხსნის ერთ-ერთი საუკეთესო მაგალითია.
